Aqtóbe oblysynyń ákimi Berdibek Saparbaev komýnaldy qyzmetterdiń, merdiger mekemelerdiń, Tótenshe jaǵdaılar departamentiniń kúshteri men quraldarynyń aldaǵy qysqy kezeńge daıyndyǵyn tekserdi.

Óńir basshysy qar tazalaıtyn jáne basqa da mamandandyrylǵan tehnıkalardy qarap shyǵyp, jaýapty memlekettik organdar men merdiger kásiporyndardyń basshylarymen kezdesti.

Kún saıyn bizdiń oblystyń aýmaǵynda 30 myńǵa jýyq avtokólik, sonyń ishinde jolaýshylar kóligi tranzıtpen tasymaldaıdy. Bıyl qys qarly bolady dep boljanyp otyr, sondyqtan aldyn ala daıyndalý kerek. Sizderdiń mindetterińiz – kedergisiz jol júrýdi qamtamasyz etý, al eger jolda adamdar qıyndyqqa tap bolsa – olarǵa qonatyn jer men tamaqtanýlaryn uıymdastyrý kerek,- dep atap ótti Berdibek Saparbaev.

Óńir basshysy qala bıliginiń nazaryn tazalyqty, qala kóshelerindegi qardyń ýaqytyly jınalyp, shyǵarylýyn qamtamasyz etýge aýdardy. Aqtóbe qalasynda qysqy kezeńde qar tazalaý jumystarymen 11 kásiporyn aınalysatyn bolady. Barlyǵy 220 birlikten asa arnaıy tehnıka, sonyń ishinde avtogeıderler, qaıyrmasy men shetkasy bar MTZ-80 kólikteri, jol-kombınasıaly mashınalar, shnekorotorlar, qumshashyratqyshtar, júk tıegishter, júk túsirgish mashınalar men taǵy basqalar jumyldyrylǵan. Barlyq jabdyq daıyn kúıde. 600 tonna tuz, 1500 tonna tuz qospasy jáne 1000 tonna qummen qamdanǵan. TJD jelisi boıynsha 139 jylytý beketi men úsh tas jol medısınalyq-qutqarý pýnkti, 600 birlikten asa tehnıka daıyndalǵan, onyń ishindegi 44 birlik tehnıkanyń ótkishtigi joǵary.