Túrkistan oblysynyń Saıram aýdanynda 9 jastaǵy balany zorlamaq bolǵan kúdikti ustaldy. Quzyrly organdardyń dereginshe, 42 jastaǵy er adam ishimdik iship kelip, kámelet jasqa tolmaǵan balaǵa seksýaldyq sıpattaǵy zorlyq-zombylyq áreketter jasapty. Óńirde dál osyndaı oqıǵa bir aı buryn ǵana bolǵan edi. Ol kezde 56 jastaǵy er adam kórshisiniń 7 jasar qyzyn zorlap, qamaýǵa alyndy. Al búldirshinniń áke-sheshesi sumdyq jaǵdaı bolǵanda jumysta bolypty. Mundaı kisi janyn túrshiktirer qylmystardyń ońtústik óńirde jıilip ketýine ne sebep? Pedofılderge kastrasıa arqyly jaza qoldanylǵanymen, olar nege kóbeıip barady? Bul týraly Eýrazıa birinshi arnasy habarlaıdy.
Qylmystyq oqıǵalarmen asa aty shyqpaǵan Aqsýkent aýylyndaǵy jeke turǵyn úılerdiń birinde sumdyq oqıǵa boldy. Mektepte oqıtyn 9 jastaǵy balany 42 jastaǵy aýyl turǵyny zorlamaq bolady. Oqıǵanyń qalaı órbigeni tergeýge baılanysty qupıa saqtalýda. Biraq er adamnyń ishimdikke toıyp alyp, kishkentaı balaǵa tıispek bolǵany aqparat quraldarynda jarıalandy.
"İshimdik iship alyp, kámelet jasqa tolmaǵan balany zorlamaq bolǵan er adamǵa qatysty qylmystyq kodekstiń 24-baby, ıaǵnı "qylmysqa daıyndalý jáne qylmysqa oqtalý" jáne 121-baby "seksýaldyq sıpattaǵy zorlyq-zombylyq áreketter" boıynsha qylmystyq is qozǵaldy. Kúdiktini eki aıǵa qamaýǵa alý týraly sanksıa berildi”, – deıdi Saıram aýdandyq sotynyń sýdıasy Dına Toıjanova.
Ótken aıda ǵana Shymkentte kórshisiniń 7 jasar qyzyn zorlaǵan 56 jastaǵy er adam qamaýǵa alynǵan edi. Jasy alpysty alqymdaǵan shymkenttik kórshisiniń 7 jasar qyzyn óz úıine ertip ákep, azǵyndyq áreketterin jasaǵan. Polısıaǵa kúdikti bul iske araqqa mas bolǵan halde barǵanyn aıtyp aqtalǵysy kelipti.
Taǵy bir oqıǵa. Tapa-tal túste 11 jastaǵy ul balany ustap alyp, týra podezdiń ishinde zorlamaq bolǵan pedofıldiń áreketi kúlli eldi shoshytqan edi. Esik aldynda alańsyz oınap júrgen jetkinshekti jelkelep, óziniń azǵyn qıalyna erik bermek bolǵan er adamdy turǵyndardyń biri kórip qalǵan. Abyroı bolǵanda, kúdikti az ýaqyttyń ishinde aram oıyn júzege asyryp úlgermegen.
♦Shymkentte er adam 11 jastaǵy balany zorlady: polısıa pikir bildirdi
“Bala sol kezde úıge kirmeı aq-qoıaıyn, domofonmen aıta qoıamyn dep domofondy basyp turǵanda anaý artynan keledi ǵoı. Sóıtip zorlyqpen ishke kirgizedi. Esikti ishinen jaýyp qoıady”, – deıdi oqýshynyń ájesi.
Óńirde aıtýǵa aýyz barmaıtyn osy tektes qylmystar jıilip ketýine taǵy mysal. Dál osy Túrkistan oblysynda elimizde alǵash ret pedofıldi hımıalyq jolmen kastrasıa jasaldy. Jalpy bıyl qylmyskerlerdiń jynystyq qarym-qatynasqa degen qushtarlyǵyn basýǵa baǵyttalǵan sharalarǵa qazyna qarjysynan 9,5 mıllıon teńge bólingen edi. Biraq jazanyń jańa túri kesapatty azaıtyp jatqan joq deıdi mamandar. Sebebi aqparat quraldarynyń betinde eki kúnniń birinde pedofılden zardap shekken búldirshinder týraly aqparat shyǵyp jatady. Odan bólek beıkúná jetkinshektiń taǵdyryn oırandaǵan qylmyskerge egiletin preparattyń kúshin joıatyn dáriler de bar bolyp shyqty.
“Antıdottar deıdi. Jańaǵy hımıalyq kastrasıadan keıin onyń kúshin joıyp tastaıtyn dáriler bar. Meniń oıymsha, bul dáriler resept arqyly satylady”, – deıdi ýrolog Marat Syıhymbaev.
Dúnıejúzilik densaýlyq saqtaý uıymynyń málimetinshe, áli dúnıetanymy qalyptasyp úlgermegen bala ózge bireýdiń tarapynan zorlyq áreketten zardap shekse, eseıgende depressıaǵa jıi ushyraıdy eken. Tipti, emi joq psıhıkalyq aýrýlarǵa shaldyǵady. Eń qorqynyshytysy keıin pedofıl bolyp shyǵýy da múmkin.
«Bul zorlyq zombylyqtyń basym bóligine, zorlaný túrine baılanysty, jynystyq qatynas, uryp-soǵý bolsa, ol pedofıldik áreketke deıin barýy múmkin. Al odan zorlyq-zombylyq shekten shyqpaǵannyń ózinde ol bolashaq qyzmetker daıyndaýǵa tolyǵymen áser etedi», - deıdi psıholog Aqgúl Moldabekova.
Pedofılıa dúnıejúzilik aýrýlar klassıfıkasıasyna seksýaldyq qalaýdyń biri retinde engen. Psıholog mamandar pedofılderdiń qurbany bolý degen ondaǵan tipti jıyrma jyl buryn da bolǵanyn aıtady. Iaǵnı olar ózderiniń qurban bolǵandaryn ata-analaryna aıtpaǵan jáne tártip saqshylarynyń kómegine júginbegen. Al qazirgi olarǵa qatysty jaza hımıalyq kastrasıa bıyl ǵana kúshine endi. Biraq onyń qanshalyqty azǵyndardy jónge salǵanyn eshkim aıta almaıdy.
