Memleket basshysy Nursultan Nazarbaev "Otyrar sazy" memlekettik akademıalyq fólklorlyq-etnografıalyq orkestriniń jetekshisi Dinzýhra Tilendıevany qabyldady, dep habarlaıdy Qamshy.kz aqparat agenttigi Aqordanyń deregin negizge alyp.
Kezdesý barysynda memleket basshysy "Rýhanı jańǵyrý" baǵdarlamasyn júzege asyrý aıasynda mádenıet pen óner salasyna turaqty túrde qoldaý kórsetýdiń mańyzdy ekenin atap ótti.
"Sizdiń ákeńizben uzaq jyl boıy jaqsy tanys boldyq. Akademıalyq degen ataǵy bar "Otyrar sazy" orkestri sol kisiniń esimimen atalady. Kezinde bul orkestrde 6 adam bar edi, qazir 66 mýzykant jumys isteıdi", – dedi Qazaqstan prezıdenti.
Nursultan Nazarbaev rýhanı jańǵyrý baǵdarlamasynda kórsetilgen mindetterdi oryndaý isinde fólklorlyq-etnografıalyq orkestrdiń róli erekshe ekenin aıtty.
"Gastrólmen Fransıaǵa bardyńyzdar, Astanada óner kórsettińizder. Halqymyzdyń mýzykalyq aspaptaryn búkil álemge tanytyp júrsizder. Tól ónerimizdi dáripteý maqsatymen Ulttyq dombyra kúni de bekitildi. Ony merekeleýge 1 myńnan astam dombyrashy qatysty. Munyń bári "Rýhanı jańǵyrý" baǵdarlamasynyń baǵyttaryna saı keledi. Siz uly kompozıtor Nurǵısa Tilendıevtiń isin jalǵastyryp kelesiz, sol úshin alǵys aıtamyn", – dedi Elbasy.
Dinzýhra Tilendıeva ulttyq óner salasyn damytýǵa zor mán berip otyrǵany úshin Qazaqstan prezıdentine alǵys bildirip, elimizde júzege asyrylyp jatqan damý baǵdarlamalaryn qoldaıtynyn aıtty.
