Aqordada Qazaqstan Prezıdentiniń tóraǵalyq etýimen  ishki ister organdary qyzmetin reformalaýǵa qatysty úlken keńes ótti. Oǵan Elbasy men tıisti mınıstrlikterdiń jetekshileri men mamandary qatysty.

Keńeste sóz alǵan memleket basshysy Nursultan Nazarbaev tıanaqty jumystardyń arqasynda elimizde, ásirese sońǵy úsh jylda qylmys deńgeıi 17,5 paıyzǵa qysqarǵanyn atap ótti.

–Adam qylmystyq, qaskóılik áreketterden qorǵaný úshin birinshi kezekte polısıaǵa júginedi. Táýelsizdik jyldary ishinde 779 qyzmetker qaza taýyp, shamamen 2,5 myńy jaraqat aldy. Muny esten shyǵarmaýymyz kerek. Buǵan qosa, ishki ister organdarynyń aǵymdaǵy jaǵdaıy qoǵamnyń suranysyna tolyq kólemde jaýap bere almaıdy, - dedi Memleket basshysy.

Keńeste Nursultan Nazarbaev quqyq qorǵaý qyzmetkerleriniń azamattarmen aradaǵy isi úılesimdi bolý qajettigin qadap aıtty. Sondyqtan da halyqtyń renishin týǵyzbas úshin búgingi polısıa zaman talabyna saı qyzmet etýi kerek.

–İshki ister organdary júıesiniń qyzmeti qoǵamnyń senimin aqtaı almaıdy, azamattardyń keıistigin týdyrýda. Adamdar ózderin qaýipsiz sezinbeıdi. Onsyz biz qazaqstandyqtardyń joǵary ómir sapasyn qamtamasyz ete almaımyz. Sondyqtan polısıany reformalaý isine shuǵyl kirisýimiz qajet, - dedi Elbasy Nursultan Nazarbaev keńeste sóılegen sózinde.

Rasynda Prezıdent halyqqa arnaǵan Joldaýynda atap kórsetkendeı, polısıa qyzmetiniń sapasy óte joǵary dárejede bolýy kerek. Bul oraıda Elbasy polısıaǵa degen senim artyp, qyzmet te jedel bola túsetinine senim bildirdi. Árıne polısıanyń jumys sapasyn arttyrý úshin keıbir quram ońtaılandyrylýy múmkin.

– Artyq nárseniń bárinen arylyp, qylmyspen kúres júr­gizý jáne quqyqtyq tártipti saqtaý isine mán berý kerek. Qurylymdar ońtaı­lan­dyrylady. Sonyń nátıjesinde bir basshynyń qaramaǵynda úsheý emes, bes adam bolady. Shtat sany 10 paıyzǵa qysqarady. Osy sharalar polıseıler sanynyń 100 myń adamǵa shaqqanda 471 polıseıden kelýin 424-ke deıin tómendetýge jol ashty. Bul eýropalyq ortasha deńgeıge sáıkes keledi. Osyǵan oraı, 16 mıllıard teńge únemdelmek, – dedi Qazaqstan Prezıdenti.

Osy jerde aıta ketetin bir nárse, prezıdent únem­­delgen qarajatty qyzmet­ker­lerdiń eńbekaqysy men áleý­mettik qamtý júıesin jaq­sar­týǵa jumsaýdy tapsyrdy.

Sonymen qatar, ishki ister organdary qyzmetin reformalaýǵa qatysty úlken keńeste Elbasy tarapynan polıseılerdiń jalaqysyn arttyrýǵa qosymsha 21,4 mıllıard teńge bólinetini  aıtyldy. Tek bir-aq nárse, osy oraıda jasalynyp jatqan reformaǵa sáıkes, polısıa ókilderi de óz mindetin minsiz atqarýy kerek.

Árıne, quqyq qorǵaý organy ókilderiniń jumysy sapaly bolýy úshin eń aldymen olardyń áleýmettik-turmystyq jaǵdaıynyń jaqsarǵany da abzal. Ol polıseıler turǵyn úımen qamtamasyz etilýi qajet. Bul oraıda  Prezıdent qoǵamdy tártipti saqtap, qylmystyq ispen kúresetin quqyq qorǵaý organdary ókilderi jumysyn burynǵydan da kúsheıtýi qajet ekendigin aıtty.

Eń basty másele, «meniń polısıam – meni qorǵaı ma? Búgingi mazasyzdanǵan qoǵamnyń basty saýaly da osy. Sondyqtan ne isteýmiz kerek? Ol úshin eń aldymen polıseılerdiń ózderi tártipti qatań saqtaýy qajet. Eger quqyq qorǵaý organdary ókilderi tarapynan qandaı da bir teris qylyq jasalatyn bolsa, onda polıseıler barlyq jeńildikterinen aırylyp, jumys ornynan bosatylady. 

–Bizge jańa formasıanyń polıseıleri qajet. Kadrlardy irikteý, daıarlaý jáne ilgeriletý júıesi qaıta qarastyrylatyn bolady. Vedimistik bilim berý isi aıtarlyqtaı ózgeredi. Mamandardy daıarlaý sapasy álemdik standarttarǵa saı keletin zamanaýı polısıa akademıalary qajet, – dedi Memleket basshysy.

 Elbasy osyǵan baılanysty «İshki ister mınıstrligine tıesili 12 oqý ornynyń úzdik beseýi ǵana qalatynyn aıtyp, oǵan bilikti oqytýshylar irikteledi»,- dep atap kórsetti.

Keńes sońynda prezıdent Nazarbaev jurtshylyqqa jańadan tanystyrylyp jatqan polısıa formasyn kórip, óz oı-usynysyn aıtty.

Erkin Qaldan