Memleket jáne qoǵam qaıratkeri, pedagog-ǵalym Shámshá Berkimbaeva Prezıdenttiń «Uly dalanyń jeti qyry» atty maqalasyna óz jyly lebizin bildirdi.

«Elbasynyń «Uly dalanyń jeti qyry» atty maqalasyn oqı otyryp, áli kúnge deıin ulttyq qundylyqtarymyzdy baǵalaı almaı júrgenimizge taǵy kóz jetkizip otyrmyn. Aıdyń-kúnniń amanynda, rýhanı, mádenı baılyǵymyzdy basqalardan tamashalap otyrǵanymyz eldigimizge jarasa ma? Buǵan kináni ulttyq qundylyǵymyzdy ulyqtap otyrǵan ózge elden emes, barymyzdy baǵalaı almaǵan ózimizden izdegenimiz jón sekildi», - dep sóz qozǵady.

Osyǵan qosa Shámshá Berkimbaeva halqymyz ulttyq qundylyǵymyzdy odan ári jańa zamanǵa saı damytyp, álemge tanytý qajettigin alǵa tartty.

«Elbasynyń maqalasynda aıtylǵan jylqy, alma taqyryptary bári-bári ózimizdiń tól qundylyqtarymyz. Mysaly, Mońǵolıada jylqyǵa arnalǵan murajaı bar. Bizde nege sondaı ǵımarat ashpasqa?! Jylqy bizdiki deımiz, alaıda qyrǵyzdar kókpar bizdiki deıdi, al nemis qymyz bizdiki deıdi. Ulttyq qundylyqtardyń bastaýy – otbasy. Qazaqtyń ulttyq dástúrleri keleshek urpaq úshin rýhanı azyq bolyp qalý kerek. Taǵy bir aıtarym, teatrlarymyz shet el klasıkterimen kóptep áýestenip ketken syńaıly. Árıne, klasıkanyń aty – klasıka, odan úırenerimiz de, úlgi eterimiz de az bolmasa kerek. Alaıda, ult teatrynyń eń basty mindeti – óz halqyna tek shetel shyǵarmalaryn jarnamalaý emes qoı?! Qaıta ózimizdiń ulttyq dramatýrgıamyzdy, operamyzdy  damytyp, sony shet elge kóbirek shyǵarýǵa talpynys jasaýymyz kerek. Máselen, Abaı atyndaǵy opera jáne balet teatrynyń repertýarynda birde-bir otandyq qoıylymnyń joqtyǵyn baıqadym. «Kúı saltanaty» degen saraı salyp, kúıshiler murajaıyn dúnıege keltirsek degen usynys bildirer edim», - dep aıaqtady spıker.