Memleket jáne qoǵam qaıratkeri Nurlan Orazalın Elbasynyń «Uly dalanyń jeti qyry» atty maqalasyna qatysty óz oıyn bildirdi.

«Elbasy N.Nazarbaevtyń «Uly dalanyń jeti qyry» atty maqalasyn Alashtyń altyn besigi sanalatyn Almatynyń zıaly qaýymy eń alǵash bolyp talqylady. Bul – túbegeıli óziniń Ata zańy bar eldiń ishki jáne syrtqy jaǵdaıyn, jalpy memleketti saqtap qalýǵa úlken áser berip, baǵyt bolatyn eńbek dep esepteımin. Negizi QR Prezıdentiniń Jarlyǵymen 1998 jyl «Halyq birligi men ulttyq tarıh jyly» dep jarıalanǵan bolatyn. Sol jyldardan bastap elimizdiń tarıhqa den qoıǵanyn baıqaý qıyn emes. Araǵa on jyl salyp ishki tutastyǵymyzdy, syrtqy abyroı-bedelimizdi saqtap qalý jónindegi máseleler Elbasynyń kezekti keleli maqalasynda keńinen qamtylyp otyr.

Biz – táýelsiz elmiz. Qazaqstandy búkil álem tanıdy. Endigi jerde taǵylymdy tarıhymyzdy zerdelep, tarıhı qundylyqtarymyzdy pash etýimiz kerek. Jańaǵy juqa tarıhty qalyńdatýymyz tıis. Tarıhty nasıhattaý máseleniń bir qyry ǵana. Zertteý men oqytýdyń da arqalap turǵan júgi óte aýyr. Túptep kelgende, tarıhty salıqaly zertteý men bilikti oqytý ony nasıhattaýdyń mazmuny men órisin anyqtaıdy», - dep tarqatty qaıratker.