Qazaqstannyń Ulybrıtanıadaǵy mádenı kúnderi aıasynda Londonda Dımash Qudaıbergenniń jeke konserti ótti. Bul - qazaq jurtshylyǵy úshin jaǵymdy jańalyq boldy. Qazaqstandyqtar Eýropa tórinde Dımashtaı kúmis kómeı ánshiniń shyǵarmashylyq keshi ótetindigin zor jetistikke balady. İshteı súıikti ánshisine rızashylyǵyn bildirgen de bolar. Tek Qazaqstan emes, álemdegi 50-ge jýyq elde turatyn Dımashtyń tyńdarmandary, jankúıerleri konsertti asyǵa kútti. Bıletterdi japatarmaǵaı satyp alyp jatty.
Mine sol kún jetti. 19 qarasha. Ulybrıtanıa júregi – Londondaǵy «Indigo at the O2» zalyna adamdar kóterińki kóńil kúımen jınalyp jatty. Súıikti ánshisimen qaýyshý, birneshe saǵat boıy onyń ónerin tamashalaý olarǵa qýanysh syılady.
Konsertke barý múmkindigi bolmaǵan qazaqstandyqtar elde otyryp taqymyn qysty. Jan-tánimen Londonda boldy. «Konsert qalaı ótip jatyr eken?» degen suraq ta mazalady. Ókinishke qaraı, qazaqstandyqtar Dımash Qudaıbergenniń jeke konsertin otandyq telearnalardan tikeleı efırde kóre almady. Ondaǵy atmosferany tek áleýmettik jeli arqyly ǵana baqylap otyrdy. Basqa amal bolmady. Konsert ótip jatqan sahnany kórip taǵy muńaıdy. Kórermenniń renjıtin jóni bar. Konsert Qazaqstan Respýblıkasy Mádenıet jáne týrızm mınıstrliginiń uıymdastyrýmen ótti – bir. Qazaqstannyń Ulybrıtanıadaǵy mádenı kúnderi aıasynda ótti – eki. Alaıda konsertte biraz olqylyqtar boldy. Jo-joq másele Dımashta emes jáne bolý da múmkin emes. Bul jerde konserttiń uıymdastyrylýynda bolyp otyr. Oǵan jeke-jeke toqtalyp óteıik.
Halyqtyń qazaq balasynyń konsertin teledıdar arqyly tikeleı efırde tamashalaımyz degen úmiti basym edi. Alaıda mıllıondaǵan tyńdarmannyń úmiti aqtalmady.
Áleýmettik jelide konserttiń qysqa beınekórinisteri men úzindileri tolyp júr. Ókinishtisi, sapalysy joqtyń qasy. Onyń sebebi de túsinikti. Professıonaldy kameraǵa túsirilmegen. Jankúıerlerdiń estelik úshin uıaly telefonǵa túsirgen vıdeolary ǵana. Biraq olar sapasyz bolǵanyna qaramastan kórilimi kóp. Sebebi konsertke bara almaǵan Dımashtyń tyńdarmandary jappaı vıdeosyn izdedi. Qolda bar materıalǵa qanaǵattandy. Olarda basqa amal bolmady da.
Demek osydan keıin «Dımash Qudaıbergenniń Londondaǵy konserti nelikten otandyq telearnalarda tikeleı efırde kórsetilmedi?» degen zańdy suraq týady. Oǵan deıin Dımash qatysqan «I am a singer» jobasyn qazaq jurty asyǵa kútti. Youtube-te vıdeonyń jarıalaýyn taǵatsyzdana kútti. Oǵan onyń kórilimi dálel bola alady. «Jobada aıtqan áni jarıalandy» degen habar shyǵa salysymen halyq japatarmaǵaı ony kórdi. Sol kezde de birqatar azamat «I am a singer» jobasyn nelikten otandyq telearnada kórsetpeıdi?» dep saýal joldaǵany belgili. Alaıda sol kezde de suraq jaýapsyz qaldy.
Endi mine sol jaǵdaı qaıtalanyp otyr. Bul jerde másele tereńirek emes pe, edi? Tek Qazaqstan kóleminde ǵana emes, álemge tanylyp kele jatqan bulbul ánshiniń Eýropadaǵy jeke konsertin Mádenıet jáne sport mınıstrligi otandyq telearnadan tikeleı efırde kórsetse, tyńdarman da rıza, telearnaǵa da joǵary reıtıń, mınıstrlikke de úlken abyroı bolýshy edi. Han da rıza, qalyń buqara da rıza. Alaıda taǵy da qaıtadan «eger», «osylaı bolýshy edi» degen tátti qıalmen ómir súrip kelemiz. Naqty nátıje joq.
«Sıfrlyq Qazaqstan» dep urandatamyz. Tehnıka damyǵan, tehnologıa men aqparat zamanynda Qazaqstannyń brendine aınalǵan Dımash Qudaıbergenniń konserti otandyq telearnalarda tikeleı efırde kórsetilmegeni uıat. Oǵan qarjy jetpegen shyǵar dep ózińdi jubataıyn deseń, qazaqtyń taǵy bir maqtanyshy Gennadıı Golovkınniń jekpe-jegi otandyq telearnalarda tikeleı efırde kórsetiledi emes pe?
Konsert ótken zal da tym kishkentaı kórindi. Mamandardyń aıtýynsha, Dımashtyń dıapazony keń, oktavasy óte joǵary. Bir sarapshy 6 dese, endi biri 5 ekenin aıtady. Dımashtyń daýysy operalyq daýysqa da keledi. Sondyqtan, onyń tar sahnada baryn salyp án aıtqany konsertke kelgen qaýymǵa durys jetti me? Zaldyń akýstıkasy Dımashtyń daýysyn tabıǵı, sol kúıinde ádemi jetkizýine saı keldi me? Tipti meıramhanada án aıtyp nápaqasyn taýyp júrgen ánshilerdiń ózi akýstıkasy durys emes ǵımarattarda án shyrqamaýǵa tyrysady.
Sanaýly saǵatta ónerimen, boıyndaǵy talantymen búkil álemdi súısindirgen Dımash Qudaıbergen Londonda qazaqtyń qara dombyrasyn kúmbirletti. «Adaı» kúıin quıqyljyta tartyp qazaqtyń ulttyq aspaby – dombyranyń sazdy únimen sheteldikterdi tánti etti. Qazaqtyń halyq áni «Daıdıdaýyn» sheteldikterge jatqa aıtqyzdy. Birneshe saǵat boıy tik turyp 29 ándi jandy daýysta shyrqaǵan Dımash, konsertten túsken qarjyny jas talanttardyń órkendeýine quıatyn boldy.
Endi Qazaqstandy Dımashymyz arqyly álem taǵy tanıtyn bolady. Táýelsizdik kúni jaqyndap kele jatqan tusta Dımash Qudaıbergenge marapat berilmese, ol endi eldigimizge syn.
