Mańǵystaýda 2017-2018 jyldary jer ýchaskesiniń paıdalaný merziminiń ótýine baılanysty qaıtarylǵan jáne ıgerilmegen kólemi 26413,87 gektardy quraıtyn 452 jer ýchaskesi anyqtalǵan. Al jalpy kólemi 20733,2054 ga bolatyn barlyǵy 171 jer ýchaskesi memleket menshigine qaıtarylǵan. Bul jóninde Mańǵystaý oblysynyń ákimi Eraly Toǵjanovtyń tapsyrmasyna sáıkes oblys ákiminiń orynbasary Rýslan Sákeevtiń jer qatynastary máselesine qatysty ótkizgen jıynynda aıtyldy.
Oblys ákiminiń baspasóz qyzmetiniń málimetinshe, jerdiń maqsattyq nysanyn aýystyryp, basynda belgilengen jospardan basqa nysan salyp qoıý deregi jıilegen. Ásirese Túpqaraǵan men Munaıly aýdandarynda osyndaı zańbuzýshylyq kóp kezdesedi. Sonymen qatar, Beıneý aýdanynda zańsyz berilgen jer ýchaskesi memleket menshigine qaıtaryldy. Joǵaryda atalǵan zań buzýshylyqtarǵa jol bergen jer salasyna jaýapty aýdan ákimderiniń orynbasarlaryn jer, sáýlet jáne qala qurylysy bólimderiniń basshylaryn tártiptik jaýapkershilikke tartý jóninde tapsyrma berildi. Al Jańaózen qalasynda 18 jer ýchaskesi boıynsha sot prosesi júrip jatyr.
Búginde oblys boıynsha jeke turǵyn úı qurylysyn salý úshin jer ýchaskelerin alýǵa kezekte turǵandar sany 166 312 adamdy quraıdy. Qazirgi kezde barlyq eldi mekenderdiń bas josparlary jasaqtalǵan. Olardyń ishinde Aqtaý men Jańaózen qalalarynda jeke turǵyn úı qurylysy úshin alańdar qaralmaǵan, basqa aýdandar boıynsha bas josparynda 26820 ýchaske qaralǵan.
Jer qatynastary salasynyń máseleleri qashan da oblys ákiminiń qadaǵalaýyndaǵy ózekti baǵyttardyń biri. Jerge qatysty, jerdiń paıdalanylýyna, buzylýyna, ıgerilmegen jerlerdi memleket menshigine qaıtarýǵa baılanysty ákimdikte birneshe jınalystar ótkizilip, oqý-ádistemelik kitapshalar taratylyp, naqty tapsyrmalary berilgen.
