Búgin elordadaǵy Eýrazıa ulttyq ýnıversıtetinde belgili dintanýshi, qoǵam jáne rýhanıat qaıratkeri Erjan Haziret Tólegenulynyń muralaryn zerdeleýge arnalǵan respýblıkalyq ǵylymı-praktıkalyq konferensıasy ótti. «Din tuǵyry jáne ilim qaınary» dep atalatyn jıynǵa oblys ákimi Eraly Toǵjanov bastaǵan mańǵystaýlyq zıaly qaýym ókilderi, QR Parlamenti Májilisiniń depýtattary, L.N. Gýmılev atyndaǵy Eýrazıa ýnıversıtetiniń rektory Erlan Sydyqov, elimizdiń ár aımaǵynan dintanýshy teolog mamandar, Astanadan tarıhshy ǵalymdar qatysty.

Shara barysynda sıasy keppengen «İlimniń bulaǵy-taqýalyq qaınary» atty Erjan Tólegenulynyń kitaby tanystyryldy. Sonymen qatar Májilis depýtaty Taras Hıtýov, Eýrazıa ulttyq ýnıversıtetiniń prorektory Dıhan Qamzabekuly, fılosofıa jáne teologıa ǵylymdarynyń doktory, profesor Dosaı Kenjetaı QR Mádenıet jáne sport mınıstrligi Din máseleleri jónindegi ǵylymı-zertteý jáne taldaý ortalyǵynyń dırektory Aınur Ábdirásilqyzy baıandama jasady.

Alqaly otyrysta sóz alǵan oblys ákimi Eraly Toǵjanov: «Biz artynda óshpes mura qaldyrǵan Erjan Tólegenulynyń eńbekterin jarıalap, ǵylymı derekterge súıene otyryp jumysty qolǵa aldyq. Bul jobanyń artynda qanshama ǵalymdarymyzdyń eńbegi jatyr. Ómiriniń sońyna deıin astyrtyn jáne jarıa túrde qýdalaý men qadaǵalaý aıasynda bolǵan Erjan hazirettiń ómiri, úlken kóregendiligi, parasattylyǵy men aqyldylyǵy ári júrek ımandylyǵy jas urpaqqa úlgi. Basqosýǵa kelgen qonaqtar maǵynaly jıynnyń mańyzyna toqtalyp, az ýaqytta kóp dúnıe alyp, rýhanı jandúnıeni toltyryp shyqqandaryn jasyrmady. Sonymen qatar, ǵylymı shara tek oblys kóleminde qalyp qoımaı, túbekten Saryarqa jerine kelip ótkizý uıymdastyrýshylardyń úlken isi», - dep baǵa berdi