Aqtaýda Erjan Haziret (Ermuhammed) Tólegenuly abyzdyń muralary taǵylymyna arnalǵan «İlim bulaǵy – kemeldik nári» atty respýblıkalyq ǵylymı-praktıkalyq konferensıasy ótti. Konferensıa barysynda Erjan Haziret qoldanǵan rýhanı ǵylym, ǵıbratqa toly ómir joly jáne taǵylymy tóńireginde belgili dintanýshylar men ǵalymdar tarapynan baıandamalar jasalyp, «İlimniń bulaǵy-taqýalyq qaınary» atty haziret kitabynyń tusaýkeseri ótti. Bul týraly Mańǵystaý oblysy ákiminiń baspasóz qyzmeti málimdedi.
Konferensıaǵa Mańǵystaý oblysynyń ákimi Eraly Toǵjanov, Qazaqstan Respýblıkasy Qoǵamdyq damý mınıstrligi Qoǵamdyq kelisim komıteti tóraǵasynyń orynbasary Myrzaev Balǵabek Ábdiqaımuly, Qazaqstan Musylmandary Dinı basqarmasy tóraǵasynyń orynbasary, naııb mýftı Baýyrjan Esmahan, Nur-Múbárák ýnıversıtetiniń prorektory Qurmanbaev Qaırat, dintanýshy, ǵalym Isahan Muhan, Qyzylorda qalasy «Qalmuhammed ıshan» meshitiniń bas ımamy, tasaýýftanýshy Rysbaı Daırabaı Serikbaıuly, fılologıa ǵylymdarynyń kandıdaty, ádebıettanýshy Qabıbolla Sydıyqulynyń jary, Erjan Hazirettiń qoljazba muralaryn saqtap, búgingi urpaqqa jetkizýshi Omarqyzy Gúlshat apaı jáne Erjan hazirettiń qyzy Erjanqyzy Nesiphan qatysty. «Din salasyndaǵy memlekettik saıasatty iske asyrýdyń máseleleri»; «İzgilerdiń izbasary Erjan (Ermuhammed) haziret jáne elimizdegi dinı aǵartý máseleleri»; «Erjan haziret jáne onyń dinı muralary» taqyryptarynda baıandamalar jasaldy. Jıynda sóz alǵan Eraly Toǵjanov: "Elbasymyz Nursultan Ábishuly Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda «Ulttyq sanamyzdyń qalyptasý negizinde ulttyq tájirıbelermen qatar, dinı qundylyqtarymyzdyń da jatqandyǵyn eskersek, qazaq halqynyń dástúrli dini ulttyq kodymyzdyń tarıhı negizderiniń biri bolyp tabylady.» – dep atap kórsetken bolatyn. Búgingi basqosý aıasynda bizder áserli sáttiń, tarıhı oqıǵanyń kýási bolǵaly otyrmyz. Ómiriniń sońyna deıin astyrtyn jáne jarıa túrde qýdalaý men qadaǵalaý aıasynda bolǵan Erjan hazirettiń «Imanshart», «Dinı ósıet», «Sharıǵat» jáne «Namazdaǵy duǵalar» qoljazbalaryn kóne shaǵataı tilinde jazyp qaldyrýynyń ózi úlken kóregendiktiń, parasattylyqtyń, aqyldylyqtyń, júrek ımandylyǵynyń, rýhanıatty seze bilýiniń jáne eldiń jarqyn bolashaǵyna senýiniń aıqyn kórinisi. Jýyrda qoljazbalardy tájirıbeli tárjimashylar qazaq tiline aýdaryp, tıisti oryndarǵa túpnusqamen dáldigin
arnaıy teksertken soń, jazbalar kóne shaǵataı tilindegi nusqasy, qazaq tilindegi aýdarmasy jáne transkrıpsıasy qatar berilgen kórnekti «Ósıetnama», «İlimniń bulaǵy – taqýalyq qaınary» atty kitap bolyp basylyp shyqty. Qoljazbany kóziniń qarashyǵyndaı saqtap, bizge jetkizgen ǵalymdarǵa alǵys aıtamyn», - dedi.
