Bokstan erler arasyndaǵy Qazaqstan chempıonaty Mańǵystaý jerinde alǵash ret ótti. Oǵan elimizdiń 14 oblysy men 3 qalasynan 206- boksshy qatysty. Týrnır qorytyndysynda 2 altyn, 3 kúmis jáne 2 qola medalmen Túrkistan oblysy – 1 oryn, 1 altyn, 3 kúmis jáne 4 qolamen Mańǵystaý – 2 oryn, 1 altyn, 2 kúmis jáne 3 qola alǵan Jambyl oblysy – 3 orynǵa turaqtady.
Chempıonatqa álemdik arenalarda Qazaqstannyń abyroıyn asqaqtatyp júrgen Qaırat Eralıev, Vasılıı Levıt, Ábilhan Amanqul, Aslanbek Shymbergenov, Bekdáýlet Ibragımov, Abylaıhan Júsipov, Temirtas Júsipov, Ilás Súleımenov, Erik Áljanov, aǵaıyndy Tóltaevtar bar.
Jabylý saltanatyn sóz alǵan oblys ákimi Eraly Toǵjanov týrnırdiń joǵary deńgeıde ótýine at salysyp, qoldaý kórsetken Qazaqstan Boks Federasıasynyń basshylyǵyna alǵysyn aıtyp, jarystyń qurmetti qonaǵy Ermahan Ybraıymov, Baqtıar Artaev, Bolat Jumadilov, Baýyrjan Ospanov, Myrzaǵalı Aıtjanov, Marat Mázimbaev, Mereı Aqshalov, Birjan Jaqyp, Nurjan Kárimjanovqa Mańǵystaý halqynyń atynan rızashylyǵyn bildirdi. "Sport salasy qashan da elbasymyz Nursultan Ábishulynyń basty nazarynda. Tipti halyqqa arnaǵan ár joldaýynda da otandyq sportty damytý jáne salaýatty ómir saltyn nasıhattaýǵa basymdyq bere otyryp, aldymyzǵa naqty tapsyrmalar qoıǵan bolatyn. Sebebi búgingi jas sportshylar – erteńgi eldiń myqty azamattary men el mereıin asqaqtatatyn chempıondar. Tynymsyz ter tógip, aıanbaı eńbek etken elimizdiń sportshylarynyń týǵan elimizdiń dańqyn asyryp, jańa bıikterdi baǵyndyra berýlerine shyn júrekten tilektespin" dedi aımaq basshysy.
Sonymen qatar, saltanatty sharada eki birdeı Olımpıada oıyndary men Álem chempıonattarynyń eki dúrkin kúmis júldegeri, Azıa oıyndarynyń chempıony, Ádilbek Nıazymbetov úlken sporttaǵy karerasyn aıaqtaǵan málimdedi. Kópshilik aldynda boksshymyzǵa qurmet kórsetilip, halyq zor qoshemetpen shyǵaryp saldy.
Mańǵystaýdyń taǵy bir batyr uly, halyqaralyq dárejedegi sport sheberi, bokstan Azıa chempıony, Álem chempıonatynyń qola júldegeri, birneshe dúrkin el chempıony Berik Abdrahmanov ta bylǵary qolǵabyn shegege ilip, sharshy alańdaǵy ornyn keıingi jastarǵa amanattady.
Aıta keteıik, týrnır jeńimpazdary 2019 jyly ótetin Azıa jáne Álem chempıonattaryna qatysý múmkindigine ıe boldy. Al Álem chempıonatynda 2020 jylǵy Tokıo olımpıadasynyń joldamasy sarapqa salynady. Mańǵystaýlyq 8 júldeger Ulttyq qurama sapyna enedi. Keler jyly atalmysh saıystarǵa daıyndyqty bastaıdy.
