"Qamshynyń" hat qorjynyna otandyq ánshini synaǵan materıal kelip tústi. Ult janashyrymyn degen avtordyń synyn jarıalaı otyryp, saıtymyzdyń erkin oı-pikir alańy ekendigin eskertkimiz keledi. Synǵa ilikken ekinshi tarap ta osy quqyqty paıdalana otyryp, ózindik pikir-pozısıasyn redaksıamyzǵa joldasa, jarıalaýǵa daıynbyz.
"31 arnadan «I am singer» halyqaralyq mýzykalyq jobasyn tamashalap júrmiz. Dımashtyń baǵyn ashqan bul jobaǵa bekerden-beker bizdiń tarap qyzyǵýshylyq tanytpady. Neshe túrli kezeńderden, synaqtardan turatyn bul joba kórermenniń ishin pystyrmaıdy. Biraq «Dımashtaı jaryq juldyzdyń jaryqqa kelýin taǵatsyzdana kútemiz» dep o bastaǵy maqsat-múddesin aıqyndaǵan ádilqazylardyń keshegi áńgimesi qulaǵymyzǵa túrpideı tıdi.
Qatelespesem, 2 maýsymnyń 11 epızody, kógildir ekrannan kórsetildi. Jobaǵa qatysýshy Ádil Ahmetjanov ómirinde sahnada alǵash ret aǵylshyn tilinde án shyrqady (óziniń aıtýy boıynsha). Halyqtyń súıikti ánshisi Maqpal Júnisova men kezinde «Sýper stardan» túlep ushqan, búginde qanaty qataıǵan Maqpal Isabekova arasyndaǵy dıalog bizdiń de ún qatýymyzǵa sebep boldy. Bizdiki, shoý-bıznestiń «sap-sary jańalyqtarynan» sharshaǵan oqyrmannyń odan saıyn júıkesin juqartyp, alaýyzdyq otyn mazdatý maqsat emes. Mundaǵy maqsat – birinshiden, úlkenge qurmet, kishige izet kórsetilýin, ekinshiden, ulttyq bitim-bolmysymyz ben qazaqılyǵymyzdyń mereıi ústem bolýyn talap etý.
«Án tańdaýyń jaqsy, alaıda aǵylshynsha án tańdaǵan ekensiń, durystap daıyndalyp, aksentsiz oryndaýǵa baryńdy salýyń qajet edi» dep pikir aıtqan Maqpal Isabekovaǵa halyqtyń Maqpaly «Aksentte turǵan eshteńe joq dep oılaımyn. Bul aǵylshynnyń balasy emes, qazaq qoı» dep jaýap berdi. Halyq ártisiniń aýzymen aıtylǵan pikir oı sanasyna jetpegen jas Maqpal «Men baıqaǵanymdy aıtyp otyrmyn. Jalpy, aıtýǵa quqyǵym bar shyǵar. Árıne, aksentte turǵan dáneńe joq. Jartylaı uıǵyr bolsam da, qazaqsha tap-taza sóılep otyrmyn ǵoı» dep ashshy aqıqatty jurtqa jarıa qyldy. Jartylaı uıǵyr, jartylaı qazaq bolǵanyna qaramastan emin-erkin qazaqsha sóılep otyrǵanyn maqtanysh qylǵan Maqpaldyń bul oıyn jetkizýdegi emosıasy tákapparlyq tunyp turǵan bet-júzinen ap-aıqyn kórinip turǵandaı boldy. Bul óz kezeginde qazaq televızıasyndaǵy etıka men estetıkanyń orny oısyrap turǵanyn taǵy da bir márte dáleldedi. Sheshe turǵanda sóıleıtin qyzdyń kóbeıgeni qaı zaman!? Sheshesiniń kózin shuqıtyn qyzdyń qymsynbaýy, telejáshikke telmirip otyrǵan ákesiniń qazaqtyǵyna kúmán keltirýi endi shekten shyqqandyq. Qazaq tili degende kókirek kergen qyzymyzdyń sózine zer salsaq, Maqpal Isabekova moıyndalmaǵan 101-shi jańa esim. Asqar taýdaı ákesi qazaq bola tura, «jartylaı uıǵyrmyn, jartylaı oryspyn, jartylaı kárispin» degenderdiń barlyǵyna osy medaldi moıyndaryna taǵyp bergim-aq kelip ketti.
Dımash Qytaıdaǵy «I am singer» jobasyna qatysqan kezde tanymal shetel ánderin aksentpen oryndady. Degenmen Qytaı «aǵylshynshany, fransýzshany aksentpen aıtady eken» dep bas qatyrmaq túgili, bir aýyz sóz qozǵamady da. Tek oryndaý sheberligine basa nazar aýdardy. Talantyna tańdaı qaqty. Aıaqtarynan tik turyp, shapalaǵyn aıamaı urdy. Sonysymen de qytaı kórermeni barsha álemdi súısindirdi. Aǵylshynshasyn búgingi tańda qolǵa alǵan Dımash álemdik óner juldyzyna aınalýǵa daıyn ekendigin baıqatty.
Toqsan aýyz sózdiń tobyqtaı túıini – Qazaqstannan shyqqan kez kelgen teleónimniń irgetasy patrıotızm, ultjandylyq jáne qazaqy minez bolýyn mindetteý kerek".
Sánıa Saǵıqyzy
