Asan men Shynar Toımovtardyń otbasyn qurǵandaryna bıyl on úsh jyl. Qazirgi ýaqytta olar Aqtóbe qalasyndaǵy 6655 áskerı bóliminde kelisim-shart boıynsha qyzmet atqaryp keledi. Al, sanaýly aı buryn erli-zaıyptylar «áskerı baspana» baǵdarlamasymen osy qaladan úsh bólmeli páter alyp, baqytqa kenelgen bolatyn.
Áskerı qyzmetshi bolý- Asan Toımovtyń bala kúngi armandarynyń biri bolypty. Biz odan aldymen baspanaly bolý múmkindigin syılaǵan áskerı salaǵa qalaı kelgendigi týraly aıtyp berýin ótindik.
- Ózim osy Aqtóbe qalasyndaǵy Qobda aýdany, Á.Moldaǵulova atyndaǵy sovhozda (qazirgi Álıa aýyly) dúnıege keldim. Osy aýyldaǵy orta mektepti aıaqtaǵannan keıin, 2001 jyly ásker qataryna shaqyrtý aldym. Otan aldyndaǵy boryshymdy Shyǵys Qazaqstan oblysy, Aıagóz qalasyndaǵy 97616 áskerı bóliminde eki jyl ótedim. Elge oralǵasyn, kólik júrgizýshisi, kúzetshi sekildi ártúrli jumystardy jasap júrip, Q.Jubanov atyndaǵy Aqtóbe óńirlik memlekettik ýnıversıtetine ınjener-tehnıkalyq fakúlteti boıynsha «Jol jáne tasymaldardy tehnıkalyq paıdalaný» mamandyǵyna oqýǵa túsip, ony 2010 jyly aıaqtaǵan soń, sol oqý ornynda beınebaqylaý kameralaryna ınjener bolyp jumysqa turdym. Bir kúnderi habarlamalardan áskerı bólimge kelisim-shartpen qyzmetke shaqyryp jatqan jańalyqty estip, bala kúngi armanymnyń bir ushy kóringendeı boldy. Esh oılanbastan, birden kelip, qujattarymdy ótkizdim. Meni Muǵaljar aýdany Jem qalasyndaǵy úshinshi atqyshtar rotasynda qorǵanys beketiniń bastyǵy laýazymyna taǵaıyndady.
Bul 2011 jyldyń qarasha aıy bolatyn. Osydan keıin Asannyń qyzmette joly bolyp, 2013 jyly qyzmettik ósýine baılanysty Jańaózen qalasyndaǵy 5548 áskerı bólimine qupıa bóliminiń bastyǵy laýazymyna usynys túsip, tórt jylyn osy laýazymǵa arnaıdy. Tek, 2017 jyldyń mamyr aıynan beri týǵan jeri Aqtóbe qalasyndaǵy 6655 áskerı bóliminde qupıa bólimshesiniń bastyǵy laýazymyn aýysý týraly usynys túskeli, osy laýazymdy abyroımen atqaryp keledi.
- Negizi mektepte oqyp júrgen kezden bastap, áskerı adam bolyp, tártipke baǵynyp, áskerı formamen júrýdi armandaıtynmyn.Biraq, shaǵyn aýylda týylǵasyn bolar, aınalamda baǵyt kórsetetin adam bolmaǵannan keıin, áskerı oqý oryndary týraly aqparat jetkiliksiz boldy. Tipti, bilgen kúnde de alysqa baryp oqýǵa ol kezde shashamyz jetpes edi,-degen Asan sózin ári qaraı jalǵady:
- Otbasy adam bolǵannan keıin, qaı qalaǵa barsaq ta, úkimet bizdi jataqhanamen qamtyp otyrdy. Biraq, balalar ósken saıyn bir bólmeli páterde turý bizge qıynshylyqtar týǵyzyp júrdi. Endi mine, osy salaǵa kelgenime esh ókinbeımin. Sebebi, bireýler 30-40 jyldap júrip alatyn baspanaǵa biz qujat tapsyrǵan berer aıda qol jetkizdik. Naqtyraq aıtqanda, shilde aıynda baspana alýǵa usynys bergen bolsaq, tamyz aıynda maquldanyp, qyrkúıek aıynda páterge kirdik. Qazir oılaımyn, «eger basqa qyzmette júrsem, baspana alý biz úshin áli de arman bolar me edi?» dep. Onyń ústine áskerılerge baspananyń 20 paıyzyn ǵana tóletip, qalǵanyn úkimettiń ózi óteýi- biz sıaqty áskerı qyzmetshilerge memleket tarapynan kórsetilip otyrǵan úlken qoldaý, kómek dep bilemin. Osy oraıda, áskerı qyzmetshiler úshin osyndaı baǵdarlama oılap taýyp, sol arqyly baspanaly bolý baqytyn buıyrtqan Joǵary bas qolbasshymyz Nursultan Nazarbaevqa,Ulttyq Ulannyń bas qolbasshysyna úlken rahmet aıtamyz. Úıimiz balalardyń mektebine de, jumysymyzǵa da jaqyn. Jyly, turýǵa qolaıly,- deıdi Asan Toımov.
Dekrettik demalysqa deıin Asannyń jubaıy Shynar Toımova da kelisim-shart boıynsha atalǵan áskerı bólimde tyl qyzmetiniń is júrgizýshisi qyzmetinde bolypty.
- Bastapqyda bul baǵdarlamanyń shynaıylyǵyna kúmánimiz bolǵany ras. Qanshama jyldan beri bir bólmeni jaldap kelgennen keıin be, joldasym úsh bólmeli páterge qujatymyzdyń ótkeni týraly habarlaǵanda, qýanǵannan jylap jiberdim. Óıtkeni,12 sharshy metr bolatyn bir bólmede tamaq iship, sol jerde uıyqtap júrgen kúnder de basymyzdan ótti ǵoı. Tipti, óz baspanamyzdy alǵanymyzǵa da áli kúnge deıin sene almaı kelemiz,-deıdi qýanyshtan júzi bal-bul janǵan Shynar.
Kelisim-shartpen qyzmet etip keletin erli-zaıypty qazirgi ýaqytta úsh birdeı ul-qyz ósirip otyrǵan baqytty otbasy. Balalarynyń úlkeni- Aıjuldyz orta mekteptiń besinshi, Beıbarys- úshinshi synybynda oqyp jatyr. Al, kenjeleri- Káýsarǵa on aı. Memleket syılaǵan uıadaı, jyp-jyly baspanada olar qańtardyń qaharly aıazyn da sezinbeıtinderine senimdi.
Gúlfaırýz Tóremuratova
