«Aq jol» partıasynyń uıymdastyrýymen 24 qarasha kúni Aqtóbedegi A.Jubanov atyndaǵy ýnıversıtette "XXI ǴASYRDAǴY ALASHTYŃ AQ JOLY" JALPYULTTYQ baıqaýynyń II-kezeńi ótti dep habarlaıdy Qamshy.kz aqparat agenttigi "Aq joldyń" baspasóz qyzmetine súıene otyryp.
Aıtýly is-sharaǵa «Aq jol» QDP tóraǵasynyń orynbasary, QR Parlament Májilisiniń depýtaty Berik Dúısembınov, sondaı-aq partıanyń Ortalyq keńesiniń hatshysy Arman Sqabyluly, «Aq jol» QDP Aqtóbe fılıalynyń tóraǵasy Asqar Sadyqov jáne osy oblystyń ákimdiginiń ókilderi qatysty.
Bıyl baıqaýǵa respýblıka boıynsha 150-deı zertteý jumystary túsken. Bul – rekordtyq kórsetkish! Sonyń ishinde myńnan tulpar, júzden júırik shyqqan 34 qatysýshynyń jumysy II-kezeńge joldama aldy. Jas alashtanýshylardyń jumysyna arnaıy qurylǵan komısıa baǵa berdi. Oǵan belgili alashtanýshy ǵalym Qaıyrbek Kemeńger, fılologıa ǵylymdarynyń doktory Amantaı Shárip, tarıhshy Máden Asylbek jáne jergilikti aqyn Bıjan Qalmaǵanbet múshe bolǵanyn aıta ketý kerek.
Dástúrli túrde ótetin bul baıqaý keıbir erekshelikterimen komısıa quramyndaǵy tóreshilerdiń asa qyzyǵýshylyǵyn týdyryp, nazaryn aýdardy. Sebebi buryn-sońdy zerttelmegen tyń taqyryptar kóterildi.
– Jıyrmanyń tóńiregindegi jastar «Alashordalyqtar ıdeıasy men Stıven Kovı ıdeıasyna psıhologıalyq salystyrmaly taldaý» nemese «Maǵjannyń Máskeýdegi aǵartýshylyq qyzmeti» atty zertteýlerin ortaǵa salǵanda kópti kórgen Qaıyrbek Kemeńger men Amantaı Shárip sekildi alashtanýshylardyń ózi bas shaıqady. Súısindik. Erteńimizdiń osy jastardyń qolynda ekenin túısinip, qýandyq. Maǵjan da sony meńzegen-aý: "MEN JASTARǴA SENEMİN!», - deıdi baıqaýǵa baǵa bergen partıanyń OK hatshysy Arman Sqabyluly.
Sonymen, baıqaý qorytyndysy boıynsha, 12 úmitker III-kezeńge joldama aldy. 1-nomınasıa boıynsha: Bekjanova Nurgúl, Súleımenov Ázızbek, Aımanov Baýyrjan; 2-nomınasıa boıynsha: Jylqybaev Asylbolat, Meırambekova Dınara, Qaırat Dınara; 3-nomınasıa boıynsha: Myrzaǵalı Abaı, Kenjebaeva Altynaı,Ýálıev Talapker; 4-nomınasıa boıynsha: Álibek Baıbol, Námet Baǵlan jáne Jastlek Nadıa.
Bul baıqaýda jeńilgen qatysýshy bolǵan joq. Aqtyq kezeńge óte almaǵan jastardyń ózderi «Aq jol» partıasynyń Alǵys hatymen marapattalyp, arnaıy aqshalaı syıaqylar tabystaldy.
Al, alash qaıratkeriniń urpaǵy, ǵalym Qaıyrbek Kemeńger: «Alashqa yntyzar izdenýshiler baryna, Alashty zertteýge umtylǵan jastardy qoldaǵan azamattarǵa dán rıza boldyq. "Aq jol" partıasy sózben ǵana emes, ispen de Alashty qoldaıtynyn dáleldedi taǵy. Sábıt Baıdaly marqum aǵamyz negizin salǵan keremet joba jyldan jylǵa keńeıip, kórkeıip ósip, jańa alashtanýshy esimderdi tanyta bersin», - dep óziniń aqjarma tilegin bildirdi.
Eske sala keteıik, ulttyq baıqaýdyń fınaldyq kezeńi elimizdiń Táýelsizdik merekesi qarsańynda 14 jeltoqsan kúni Astanada ótedi dep josparlanýda.
