– Qara esek bolasyń ba? –  Óte mártebeli  qyzmette bolǵan, búginde jeke sharýasyn dóńgeletip otyrǵan, jasy jetpisten jańa asqan  bir aǵam  qazir ǵana uıaly telefonyma habarlasty. Meni qara esek qyp erttep minbek eken.

 – Siz aıtqan soń, qara esek bolyp kóreıin, aǵa.  Qansha kúnge?

 – Tynbaı tepeń qaǵyp,  esek aıańmen otyrsań, ary ketse bir aptanyń ishinde barar jerińe tuıaq iliktiresiń. İlbip bara jatsań, kók jelkeńnen shuqylap, anda-sanda ezýlep qoıyp, saýyryńa qamshy uryp otyram ǵoı.

 – Apyr-aı, á. Ýaqyty tym tyǵyz eken dá. Sozýǵa bolmas pa?

 – Bolmaı turǵany sol. Tym asyǵyspyn.

 – Úlgerem be oǵan?

 – Ne bopty úlgermeı?!

 –  Neshe shaqyrym, toıys...

 –  Óı, sen sekildi qara nardyń kúshi barǵa  túk emes. Bar-joǵy 350-aq!

– İm-m-m...Baǵdar qaı jaq?    

–  Orys  dep oılap tursyń-aý. Bul joly  –  Qytaı.  Qytaı men qazaqtyń dostyǵy úshin, qytaıdan  qazaqqa qaraı Qalban  degen qandasymyz  jol salǵan  eken.  Sol joldan súrinbeı, jyǵylmaı  óte alsaq boldy. 

 – Kórmegen jerdiń oı-shuńqyry kóp degen. Buryn-sońdy baspaǵan jerim eken dá.

 – Baspasań,  endi basasyń. Árıne, óziń aıtqandaı,  oı-shuńqyry, kedir-budyry kóp.  Ony mensiz de jaqsy bilip otyrsyń. Taqtaıdaı tegis  bolsa, seni erttep minip qaıtem.  

 – Aqysyn  aldyn ala bilýge bola ma?

 – Aqysyn artynan eseptesemin. Qoryqpa,  jaqsylap turyp tóleımin.

 – Tóleıtinińizdi bilem ǵoı... Biraq, qara esek bolǵym kelmeı tur.

 – E,  nege?

 – Sizden buryn  on bes kúndeı qara esek bop myqshyńdap, ábden qajyp, arqam qan-qyzyl jaýyr boldy. Bilesiz ǵoı, bárine qara esek kerek. Endi...birtúrli betteı almaı turǵanym.

 – Aı, baýyrym-aı, aqshańdy  jaqsylap tólesek, atsha jelip  shyǵa kelesiń áli. Ózim-aq qara esek bolar edim, átteń, ýaqytym joq.

 – Mende de ýaqyt bolmaı turǵany,  renjimeńizshi, aǵa...

 Qysqasy, san túrli syltaý aıtyp, basyma júgen kıgizse de, qara esek bolýdan bas tarttym. Aıtqanyna kónip, aıdaǵanyna júrmegen soń, qazir aǵam syrtymnan qara esekke teris mingizip jatqan shyǵar. Mingizse,  mingize bersin. Ózińiz oılańyzshy, ...qytaı tilinen qazaqshaǵa qalaı bolsa solaı  qotarylǵan  350-bettik  kitapty  bir aptada árbir árpi, útir-núktesine deıin shuqshıa qarap, óńdep, redaksıalap shyǵý  – ońaı  sharýa deımisiń. Ondaı týyndyny túzeý  – jýyndy ishkenmen birdeı...

Tóreǵalı TÁSHENOV