İs-sharaǵa «Nur Otan» partıasy tóraǵasynyń birinshi orynbasary Máýlen Áshimbaev pen Úkimet basshysynyń orynbasary Asqar Jumaǵalıev qatysty.

Mártebeli meımandar aldymen «Sıfrlyq Shyǵystyń jetistikter» kórmesimen tanysty. Oǵan «Samǵaý holdıń», «SÝRS», «SIT Damý», «Alseko», «Sılýmın Vostok» syndy seriktestikterdiń sıfrlandyrý salasyndaǵy jobalary qoıyldy.

Jıynda Máýlen Áshimbaev óńirde sıfrlandyrý baǵytynda atqarylyp jatqan jumystarǵa oń baǵasyn berdi.

– «Nur Otan» partıasy bıyl kóktemde elimiz boıynsha 1000 İT-synyp ashýdy maqsat tutqan-dy. Qazir respýblıkada 780 synyp jumys istep tur. Sonyń 277-si Shyǵys Qazaqstanda. Osy rette oblys basshylyǵynyń jáne oblystaǵy partıa fılıalynyń eren eńbegin atap ótkim keledi. Tez arada osynshama synypty ashý – ońaı sharýa emes. Endi keler jyly oblystyń barlyq 662 mektebinde İT-synyptary qurylmaq, – dedi ol.

Asqar Jumaǵalıev elimizdegi Elektrondy úkimet jobasy eń alǵash Danıal Ahmetovtiń jetekshiligimen qurylǵanyn eske salyp, aımaq basshysyna atqaryp otyrǵan jumysy úshin rızalyǵyn bildirdi.

–Elbasynyń muryndyq bolýymen qolǵa alynǵan «Sıfrlyq Qazaqstan» baǵdarlamasyn iske asyrý úshin Internet kerek. Ókinishke qaraı, barlyq eldimekenderde ol bar dep aıta almaımyz. Sol sebepti Úkimet aldaǵy 2 jarym jylda barlyq eldimekenderdi Internet jelisimen qamtyp shyǵýdy josparlap otyr. Ǵalamtor jyldamdyǵy joǵary bolady, – dedi vıse-premer.

Jıyn sońynda forým aıasynda uıymdastyrylǵan úzdik İT-sheshimderdiń respýblıkalyq baıqaýy qorytyndylandy. Kelip túsken 79 jobanyń ishinen qazylar 6-yn tańdap alypty. Olar granttarmen qarjylandyrylmaq.

– Bul alǵashqy forým, ony kelesi jyly da uıymdastyramyz, dástúrli túrde ótip otyratyn bolady. Jyldan-jylǵa aýqymy keńeıip, jobalar sany arta bermek. Bıylǵy baıqaýǵa qatysqan 10 oqýshynyń da jobasyn qoldap, granttar bóldik. Jastardyń bastamasyna jan-jaqty qoldaý kórsetýge shaqyramyn, – dedi óz sózinde aımaq basshysy Danıal Ahmetov.