2018 jyldyń 5 jeltoqsan kúni Qazaqstan Respýblıkasy Mádenıet jáne sport mınıstrliginiń uıymdastyrýymen Astana qalasynda «Qazaqstan» ortalyq konsert zalynda dástúrli Respýblıkalyq Patrıottar forýmy ótti.

Saltanatty sharaǵa Qazaqstannyń barlyq óńirinen 200 delegat qatysty. Olardyń ishinde óz kásibiniń úzdik ókilderi, el úshin qaltqysyz qyzmet etip júrgen: ortalyq memlekettik organdardyń ókilderi, uıym basshylary, etno-mádenı ortalyqtardyń jetekshileri, úkimettik emes jáne jastar uıymdarynyń jetekshileri, eńbek ardagerleri men zıaly qaýym jáne buqaralyq aqparat quraldarynyń ókilderi bar.

Forým barysynda Qazaqstan Respýblıkasy Mádenıet jáne sport mınıstri Arystanbek Muhamedıuly mereıli merekelerdiń toǵysynda ótken «Patrıottar forýmy - 2018» qatysýshylaryn quttyqtap, 20 jeńimpazdy arnaıy «Jyl patrıoty-2018» nomınasıasymen marapattady.

Marapatqa ıe bolǵandardyń qatarynda Oral qalalyq №5 avtobýs parkiniń kondýktory Shýdabaı Serikqalı Mamaıuly bar. Serikqalı Dostyq aýyly, Chývashka eldi mekeniniń Kooperatıvnaıa kóshesinde jeke turǵyn úı órtenip jatqan jerinen bir adamdy aman saqtap qalǵan.

Erligi kópke úlgi bolatyn taǵy bir «Jyl patrıoty» nomınasıasynyń ıegeri İzmaǵanbetov Berik. Ol otyryp oınaý voleıbolynan Qazaqstan quramasynyń kapıtany. Laıyqty marapatqa ıe bolǵan sportshy «Patrıot degen Qazaqstan eline, onyń ishinde týǵan jerine qyzmet jasaý, qandaı jaǵdaıda bolmasyn belsendi bolý, óz jigerin, kúshin eline, halqyna arnaý, ózderinen keıingi jastarǵa úlgi kórsetý, kómektesý. Sondaı jastardyń biri dep meni tańdaǵan eken, osyndaı nomınasıa alyp jatqanyma óte qýanyshtymyn» - dedi.

Forým sońynda kesh qonaqtaryna konserttik baǵdarlama usynylyp, estradanyń jaryq juldyzdary rýhty ánderin oryndady.