Tuńǵysh Prezıdent kúni qarsańynda Almatynyń Naýryzbaı aýdanynda balabaqsha ashyldy.

Mektepke deıingi mekeme 50 bóbekke shaqtalǵan. Degenmen, qazir balabaqshaǵa 35 bala baryp júr. Bir aıǵa ár ata 25 myń teńge tóleıdi. Al 2019 jyldan bastap kezinde kotej bolǵan bóbekjaı «Balapan» baǵdarlamasy boıynsha memlekettik tapsyrys qabyldaıdy. Jańadan ashylǵan mektepke deıingi mekemede balaǵa yńǵaıly bolýy úshin bar jaǵdaı jasalǵan.

Aıta keteıik, Naýryzbaı aýdanynda bas-aıaǵy 63 balabaqsha 3300-den astam balany qamtyp otyr. Jergilikti ákimdik aýdanda kezekte turǵan bóbek joq deıdi. Osylaısha, bılik basyndaǵylar halyqty ortalyqqa sabyltpaı, qajettilikterdi óz aýdanynan taýyp berýge múmkindik jasap keledi.  

«5 tárbıeshi jumys istep jatyr. 2 aspaz bar. Medısına kabınetinde medbıke jumys isteıdi. Bul barlyǵy tolyq zańǵa sáıkes, SES-tiń uıǵarymymen ashylǵan balabaqsha. Biz búgingi kúnge deıin 14 balabaqsha ashtyq. Endi jyldyń sońyna deıin 6 balabaqsha ashýdy josparlap otyrmyz», – dedi Almaty qalasy Naýryzbaı aýdany ákiminiń orynbasary Baltóre Pirálıev.

«Meniń balam kishi topta. 1,8 aıynda alyp keldim balamdy. Olarǵa qazirshe til úıretpeıdi. 3 jastan keıin úıretedi. Biraq qazir sanaýdy úıretip jatyr. 5 jasqa deıin qazaqsha, oryssha úıretedi. Barlyǵy kóńilimizden shyǵyp jatyr. Ásirese, osy jerdiń qyzmetkerleri qatty kóńilimizden shyǵady. Óıtkeni, olar bastysy, balama unaıdy. Demek, qyzmetkerleri balaǵa shynaıy, meıirimdi qaraıtyn jaqsy adamdar bolyp tur ǵoı», – dedi Oksana Aıapbergenova.