Almatyda «Uly dalanyń jeti qyry» atty biregeı kórme ashyldy. Kóne jádigerler ekspozısıasy qoıylǵan kórmege kelýshiler elimizde kópshilik nazaryna alǵash ret usynylǵan ǵundardyń biregeı alfavıtin tamashalady. Kórmedegi eń qundy eksponat ta osy. 136 áripten turatyn alfavıtti Qytaı ǵalymdary ártúrli elde tabylǵan  arheologıalyq oljalar negizinde qaıta qurastyrǵan.

Budan bólek, kórermender sándik-qoldanbaly óner eskertkishteriniń kóshirmelerimen, túrli kezeńdegi arheologıalyq baılyqtarmen jáne kóne túrik jazbalarymen  tanysty. Atap aıtqanda,  Kúlteginniń beıneleri, ejelgi Tonykók jazbalary jáne Araltóbeniń sarmat dáýirindegi «Altyn adam» beınesi kópti qýantty.  

Eksponattar qatarynan qazaq jerinen tabylǵan 3 altyn adamnyń birin kórýge bolady. Sondaı-aq, Shilikti jáne Jalaýly eskertkishteri mańynan shyqqan saq kezeńindegi altyn stıldik beıneleri bar kóptegen eksponattar da kóz qýantty. 

«Óziniń patshalaryn altynǵa orap qoıý – tek saqtarǵa ǵana tán dástúr. Saqtarǵa deıin de, saqtardan keıin de mundaı dástúr bolǵan joq. Saqtardyń zamanynda tústi metalýrgıa keremet damyǵan. Tústi metalýrgıanyń tehnologıasy, onyń quıý tehnologıasy damyǵany sonshalyq, áshekeı buıymdar keremet kóp bolǵan. Uly dalanyń 7 qyrynyń biri – Uly dala apaıtósinde ornalasqan qazaq jerinen tabylǵan osy altyn adamdar», – dedi ál-Farabı atyndaǵy QazUÝ-diń tarıh, arheologıa jáne etnologıa fakúltetiniń profesory Ábdesh Toleýbaev.

Jalpy, tarıhı-kórkem ekspozısıa úsh bólikten turady. «Uly dalanyń jeti qyry» kórme zalynda ejelgi zamannyń tarıhy kórsetilse, «Alash muraty» atty kelesi zalda HH ǵasyr basyndaǵy qazaq tarıhy pash etiledi. Onda táýelsizdik úshin qurban bolǵan arystardyń eskertkishteri men olardyń qundy eńbekteri usynylǵan. Al «Máńgilik El» atty zalda táýelsizdikke  qol jetkizý jolyndaǵy zamanaýı shyndyqtar keltirilgen.

Atalmysh kórme ál-Farabı atyndaǵy Qazaq ulttyq ýnıversıtetiniń kitaphanasynda jumys istep tur. Qundy jádigerlerdi tamashalaǵysy keletinder úshin esik ashyq.