Almatyda Dinmuhammed Qonaev atyndaǵy tuńǵysh meshit ashyldy. Alla úıi Alataý aýdanyna qarasty Aqbulaq shaǵyn aýdanynda boı kótergen.

Qurylysy 2014 jyly bastalǵan meshit Qonaev atyndaǵy «Saýap» qoǵamdyq-qaıyrymdylyq qorynyń qoldaýymen turǵyzyldy. Sondaı-aq, ǵıbadathanany salýǵa qarapaıym turǵyndardan bastap, qaltaly kásipkerlerge deıin úles qosqan.

Bir mezette 2 myń 200 adam qulshylyq etetin qos qabatty bul nysandy salýǵa 180 mıllıon teńge jumsalypty. Jańa meshit Almatynyń ortalyq meshitinen keıingi ekinshi úlken minajat úıi. Munarasynyń bıiktigi 29 metrdi qurasa, jalpy aýdany – 1 600 sharshy metr.  

«Imamdar bólmesi, áıelder bólmesi, oqý zaly jáne 500-600 adam syıatyn astyńǵy qabaty bar. Astyńǵy qabatta bilim alamyn deýshilerge jeke synyp qarastyrylǵan. Qazirdiń ózinde munda bilim alyp jatqan kishkentaı búldirshinderimizdiń jáne úlken qarıalarymyzdyń sany óte kóp. Bilim alyp jatqan 40-50 shaqty adam bar», – dedi D.Qonaev atyndaǵy meshittiń ustazy Talǵat Ábdirazaq.

Tórt munarasy alystan kózge túsetin meshittiń ashylý saltanatyna jınalǵan jurtta esep joq. Arasynda Dinmuhamed Qonaevtyń kózin kórgender de bar eken. Olar qalaǵa erekshe kórik berip turǵan bul Alla úıi jastarǵa rýhanı tárbıe beretin, teńdessiz oryn ekenin tilge tıek etti.

Aıta keteıik, bul – qalada boı kótergen 50-shi meshit. Qazir Almatyda taǵy 4 meshittiń qurylysy júrip jatyr.