Bıyl Almatynyń Alataý aýdanyna 10 jyl. 250 myńnan asa turǵyny bar aýdan jyl saıyn qaryshtap damyp keledi. Alǵashynda aýdan aýmaǵy 8 200 gektar bolsa, osy kúni onyń kólemi 10 myń gektardan asyp jyǵylady. Munda 10 jyldyń ishinde salyq túsimi 4 ese ósti. Investısıa 9, taýar aınalymy 1 myń ese ósken.

Gúljan Bekenova 2001 jyldan beri «Shańyraq» yqshamaýdanynda turyp keledi. Aıtýynsha, Alataý aýdany kóz aldynda damýda. Ózi dırektor bolyp qyzmet etip otyrǵan osy mekteptiń de qurylysyn óz kózimizben kórdik deıdi. Qazir munda 2 800-ge tarta oqýshy bilim alyp jatyr. Gúljan Myrzalyqyzy kelesi jyly osy bilim oshaǵyndaǵy barlyq muǵalimniń jalaqylary ósetinin aıtty.      

«Qaı kezde de bilim salasyna kóńil bólinip jatyr. Elbasy óte janashyrlyqpen qarap, bıylǵy 10 jyldyqqa qatar, óziniń joldaýyn halyqqa jarıalap otyr. Bizde qazirgi tańda 196 muǵalim qyzmet atqaryp jatyr. Jalpy, barlyq ustazdyń aılyǵy kóbeıedi dep úlken senim artyp otyrmyz. Ol másele Joldaýda da qarastyrylǵan bolatyn», – dedi Almaty qalasy №169 mektep-lıseıiniń dırektory Gúljan Bekenova  

Aýdanda 12 mektep, 98 balabaqsha, 12 densaýlyq saqtaý mekemesi ashylǵan. 2,7 mln sharshy metrdi quraıtyn kópqabatty úıler salyndy. Sondaı-aq, bıylǵy jyly 600 oryndyq mektep pen 880 orynǵa 4 balabaqsha paıdalanýǵa berilmek. Sondaı-aq, aldaǵy jyldary 350 oryndyq aýrýhana, árqaısysy kúnine 200 adam qabyldaı alatyn 2 emhana jáne birqatar shaǵyn aýdandarda balabaqshalar salý kózdelgen.

Elbasynyń ındýstrıalandyrý baǵdarlamasy sheńberinde aýdanda 490 gektar aýmaqta Indýstrıaldy aımaq qalyptasty. Búgingi kúni 4 kásiporyn iske qosylyp, taǵy 10 kásiporynnyń qurylysy júrgizilýde. Munda joǵary tehnologıaly kabel ónimderin shyǵaratyn zaýyt, gabıon toryn jasaıtyn japondyq kásiporyn jáne ıtalıandyq tehnologıamen qoqys suryptaý kesheni jumys istep tur. Sondaı-aq, aldaǵy ýaqytta hımıa, jıhaz, kólik, dári-dármek, taǵam jáne taǵy basqa kásiporyndar qurylysyn salý josparlanǵan. Aýdanda kásibin dóńgeletip otyrǵan azamattar jaǵdaıdyń barynsha jasalǵanyn aıtady.

«Eń bastysy, aýdan basshylary bizdiń jumys isteýimizge kedergi keltirmeıdi. Aldymen orynsyz tekserýler azaıdy. Alǵashynda Alataý aýdanynda kásiporyndar az boldy. Qazir olardyń sany jyl saıyn kóbeıip keledi. Kásipkerler de jaǵdaı jasalǵan jerge qaraı yǵysady ǵoı. Sondyqtan esh qıyndyqsyz munda jumysyńdy júrgizýge bolady», – deıdi etti qaıta óńdeý sehiniń dırektory Sergeı Alımpıev.

Aýdan qurylǵaly beri munda birneshe mádenı jáne sport nysandary boı kóterdi. Atap aıtqanda, «Alataý» dástúrli óner teatry, mýltımedıalyq dástúrli mýzyka ortalyǵy jáne Qolóner sheberleri ortalyǵy. Sonymen qatar, aýdanda Ýnıversıada ótken «Almaty Arena» sport kesheni ornalasqan. Osy kúni bul ǵımarat halyq ıgiligine berilgen. Qazir jergilikti turǵyndar osynda kelip, sportpen shuǵyldanýda.  

Alataý aýdanynda 10 jyldyń ishinde 223 shaqyrym elektr jelisi, 276 shaqyrym magıstraldy gaz, 406 shaqyrym aýyz sý jáne 198 shaqyrym káriz qubyrlary tartylǵan. Sondaı-aq, 93 shaqyrym jol, 3 jolaıryǵy jáne 15 aspaly júrginshiler kópiri salyndy. Aldaǵy ýaqytta yqshamaýdandardaǵy joldy jańartý basty maqsat bolyp otyr eken.  

«Bizde kóptegen káriz júıesi men sý jelileri salyndy. Búgingi kúni 500-ge jýyq shaqyrym káriz júıesi men sý jelileri salynǵan. Bıylǵy eń birinshi josparymyz – sol kósheler men yqshamaýdanǵa jol salý», – dedi Almaty qalasy Alataý aýdanynyń ákimi Shahmerden RYSPAEV.

Osy kúni Alataý aýdanynda 255 myńnan asa turǵyn ómir súrip jatyr. Búdjet esebinen aýdanǵa 430 mıllıard teńgeden astam qarjy bólinip, 20 myńnan kóp jumys orny ashylǵan. Qazir turǵyndardyń ortasha jalaqysy 60 myń men 160 myń teńge aralyǵynda.