Almazbek Atambaev: Men sol kezde Nazarbaevty ashyq synaǵanym úshin ókinbeımin

Qyrǵyzstannyń burynǵy prezıdenti  Almazbek Atambaev Kaktus.media aqparat agenttigine bergen suhbatynda kezinde Qazaqstanǵa qarata jaǵymsyz pikir aıtqanyn moıyndady jáne  sol kózqarasynan áli de qaıtpaıtynyn málim etti.

–Men bir tyrnaǵyn ishine búkken adam emespin. Allataǵala meni solaı etip jaratty. Aqty -aq, qarany – qara dep aıtatyn adammyn. Sondyqtan eshqashan únsiz júre almaımyn.

Al Qazaqstan týraly aıtar bolsaq, ol kezde Qyrǵyzstanda prezıdenttik saılaýǵa daıyndyq júrip jatty. Dál sol tusta elde saıası jaǵdaı shıelenisip turǵan sát edi. Nazarbaev prezıdenttik saılaýǵa túsip jatqan bizdiń bir úmitkerdi óziniń Aqordasyna shaqyryp sóılesti. Ony ashyq túrde qoldaıtynyn bildirdi.

Al álemdegi jaǵdaıǵa nazar aýdarar bolsaq, AQSH pen Eýropada «óz kandıdatyn»  syrttan qoldaý  ashyq baıqalyp otyr. Tipti keıbireýlerin reseılik azamattar qoldaǵany úshin ustap, qamap jatyr.

Al ótken saılaýda qazaq prezıdenti Nazarbaev qyrǵyz halqynyń aldynda ózi qabyldaǵan kandıdatty ashyq qoldaıtynyn málim etti. Mundaı jaǵdaıda nege únsiz qalýymyz kerek?!  Qyrǵyzstan – táýelsiz el.  Biz Qazaqstan sıaqty iri, baı memleket emespiz. Eger  dál qazir pikirimizdi ashyq aıtyp, ózimizdi qurmet tutpasaq, bizdi kim qurmetteıdi? Sol kezde bul pikir Nazarbaevpen qarym-qatynasymyzdy buzatynyn bildim. Biraq halyqtyń múddesi úshin, Qyrǵyzstannyń bolashaǵy úshin osyndaı áreketke bardym. Endi prezıdenttik nemese parlamenttik saılaý bolsyn, bizdiń ishki isimizge eshkim syrttan aralasa almaıdy.

Men sol kezde Nazarbaevty ashyq synaǵanym úshin ókinbeımin.

Sózimdi qaıtyp almaımyn. Adam óziniń abyroı bıiginde qalýy kerek...