Bul týraly búgin, ortalyq komýnıkasıalar qyzmetinde bolǵan brıfıń barysynda SHQO ákimi Danıal Ahmetov, jýrnalıserdiń onomastıka máselesine qatysty qoıǵan saýaldaryna jaýap berý barysynda aıtty.
- Biz, árıne, tarıhı ádilettilikke jol berýimiz kerek! Keshegi keńestik-kommýnıstik ıdeologıanyń kóleńkeli tustarynan da halyq habardar bolǵany abzal. Mysaly, Goloshekın nemese Kırovtyń kim ekenin bárimiz jaqsy bilemiz jáne túsinemiz. Sondyqtan, turǵyndardyń usynys-tilekterin eskerip, ondaı kóshelerge jańa ataýlar berilý kerek, - dedi D.Ahmetov brıfıńte.
Ákim sonymen qatar D. Mendeleev nemese S. Korolev sıaqty kóshelerdiń ataýlary ózgertýdi qajet etpeıtindigin, sol qalpynda qaldyrý kerektigin aıtyp ótti. Sebebi atalǵan tulǵalardyń esimderi búkil álem jaqsy biledi. Sol sıaqty S.Nurmaǵanbetov nemese Qurmanǵazy sıaqty uly adamdardyń attarynda da kóshe bolýy kerek. Kóshe ataýlaryn aýystyrý jumystary eń aldymen zań turǵysynda jáne jergilikti turǵyndardyń kelisimi arqyly jasalýy kerek.
Mysalǵa alatyn bolsaq Óskemendegi Karl Marks kóshesi – Qazybek bı, Semeıdegi Lenın kóshesi – Máńgilik el ataýyna ıe boldy - dedi SHQO ákimi.
Aıta keteıik, bir ǵana, Shyǵys Qazaqstan oblysynda segiz myńdaı kóshe, myńnan artyq ákimshilik-aýmaqtyq birlik bar. Olardyń basym kópshiligi qazaqstandyq biregeılik, táýelsizdik ıdealdary, tarıhı mańyzdylyǵy turǵysynan sáıkestendirilgen. Sońǵy eki jyldyń ózinde 314 kóshe aýysty. Onyń 41 oblys ortalyǵy – Óskemen qalasynda. Bıylǵy jyly oblystyq onomastıkalyq komısıa úsh júzdeı kósheni qaıta ataý boıynsha respýblıkaǵa óz usynystaryn joldaǵan.
