Jolaýshylar kóligi jáne avtomobıl joldary basqarmasy megapolıstegi troleıbýs jolynyń baılanys-kabeldik jelilerin qaıta jóndeýden ótkizip, aýqymdy jobany qolǵa almaq. Bul – troleıbýstardyń qyzmet kórsetý sapasyna da oń áserin tıgizedi.
Almatyda troleıbýstar 1944 jyly paıda bolypty. Sodan beri jyljymaly quram birtindep jańartylyp, jańa jeliler ashylyp keldi. Ekologıalyq jaǵynan taza ári tıimdi sanalatyn bul qoǵamdyq kólikke degen suranys úlken. Alaıda, tozyǵy jetken baılanys-kabeldik jeliler troleıbýstardyń minsiz qyzmet etýine kedergi keltirip otyr. Kún saıyn troleıbýs júrgizýshisiniń kólikten shyǵyp, symyn qolymen jelige salyp júrgenin kórip júrmiz. Bul jolaýshynyń ýaqytyn alýmen qatar, júrgizýshiniń ómirine de qaýip tóndiretini anyq.
– Troleıbýstardyń durys qatynamaýy tozyǵy jetken jelilerdiń sebebinen bolyp otyr. Óıtkeni, qoldanystaǵy baılanys-kabel jelisiniń standartty kerneýi jyljymaly quramnyń jelige shyǵý sanyn shekteıdi. Jeliler jańartylsa, marshrýttyń turaqty qatynaýy keminde eki esege jaqsarady, – deıdi Jolaýshylar kóligi jáne avtomobıl joldary basqarmasynyń basshysy Talǵat Hoschanov.
Jańartý jumystary barysynda 172,62 shaqyrym baılanys jelisi jóndelip, 529 baılanys jelisiniń tirekter men oqshaýlanǵan aspaly júıeler, boılyq kótergish arqany men troleıbýstyń baılanystyrǵysh symdary aýystyrylady. 39,81 shaqyrym qashyqtyqqa jetetin ASB kabelderi tartylady. Aýqymdy jumys barysynda troleıbýs jelileri ǵana jańǵyrmaıdy, sonymen qatar kósheler men jaıaý júrginshiler joly abattandyrylyp, troleıbýs joldary barynsha jaryq shamdarymen qamtamasyz etiledi. Aýqymdy jumys 2019 jyly bastalady.
