Almaty qalasy Alataý aýdany aýmaǵynda úsh kún boıy ótken qusbegilikten İİ Ashyq Azıa chempıonaty 2 jeltoqsanda tús aýa óz máresine jetti. Sóıtip, 30 qarasha kúni týyn kótergen bul jarysqa álemniń toǵyz memleketinen 71 qusbegi qatysyp, baq synasty.

Ańǵa qus salýdan, ıaǵnı qusbegilikten ótken İİ Ashyq Azıa chempıo­naty­nyń búrkit­shiler báse­kesinde barlyǵy 71 búr­kitshi baq synady. Solar­dyń arasynda onyń jar­tylaı fınalyna  10  búr­kitshi sýyrylyp shyqqan bola­tyn. Bul rette búrkitti qolǵa shaqyrý men shyrǵaǵa túsirýde Almaty obly­synan Áben Dýlat, Tastanbek Baıraq, Seıit­jan Aıan, Baıetbaı Ómir­han,  Túrkistan  oblysy­nan – Arshabaı Dáýren, Al­maty qalasynan – Qurmanǵalıev Aqberen, Atyraý oblysynan – Qoshqarov Arman, Slova­kıadan – Qanat Iaroslav, Shyǵys Qazaqstan oblysy­nan – Nurman Ómirbek jáne qyrǵyzstandyq Is­maılov Aman úzdik nátıje kór­setip, aqtyq synǵa joldama alǵan bolatyn.

Mine, jarystyń sońǵy kúni osy on búrkitshiniń ishinen qustaryn qoıan men túlkige jańylmaı, dóp túsire bilgen  myna tómen­degi qusbegiler İİ Ashyq Azıa chempıonatynyń júldeli oryndaryn ıele­nip, túrli qarjylaı syı­lyqtarmen marapat­taldy. Sonymen, atalǵan birin­shi­lik qorytyndysy boıyn­­­sha búrkit salýda 1-oryndy qyrǵyzstandyq Ismaılov Aman, 2-oryndy aqmola­lyq Tastanbek Baıraq al júldeli úshinshi báıgeni Almaty qalasy atynan qatysqan búrkit­shiler jeńip aldy.

Al endi chempıonattyń sońǵy kúni básekege túsken qarshyǵa, ıtelgi baptaıtyn 13 qusbegi arasynan Babajan Berikbolsyn (1-oryn), Mahmýthan Zakı (2-oryn) jáne Seıitjan Beksultan (3-oryn) sekildi sportshylar jeńiske jetip, İİ Ashyq Azıa chempıo­natynda mereıleri ústem boldy. Al endi ıtelgi salý­da qyrǵyz elinen kelgen Týgolboı Abdýqadyrov birinshi nátıjemen, alma­tylyq Rýslan Abdýlov ekinshi kórsetkishpen jáne úshinshi sheberlikpen jam­byldyq Úsen Aıbar bári­nen oq boıy alda boldy.

Ádettegideı qyzyqty da tartysty ótken qusbegi­likten İİ Ashyq Azıa chem­pıonaty bul joly da joǵary dárejede qorytyn­dy­landy. Bul jarysta, ásirese, qyrǵyz qusbegileri óte jaqsy nátıje kórsetip, qazaqstandyq qusbegilerdi ekinshi oryn ıelenýine májbúr etti.  Atap ótetini, bul básekede besinshi oryn alǵan qusbegilerge deıin syı-sıapatqa, ıaǵnı qar­jy­laı marapatqa ıe boldy.