Almatydaǵy Balýan Sholaq atyndaǵy sport saraıynda qazaq kúresinen «Álem Barysy» — túıe balýandar arasyndaǵy álem chempıonaty ótti. Tuńǵysh Prezıdent kúnine oraı jáne «Rýhanı jańǵyrý» baǵdarlamasy aıasynda Almaty qalasy ákimdiginiń qoldaýymen uıymdastyrylǵan bedeldi básekege 29 eldiń balýany qatysty. Sheteldik sportshylarǵa Qazaqstannyń bes balýany tótep berdi. Ereje boıynsha qatysýshylardyń salmaǵy 90 keliden joǵary bolýy kerek.
Tartysty beldesýlerdiń nátıjesinde Aıbek Nuǵymarov ekinshi jyl qatarynan «Álem Barysy» ataǵyna ıe boldy. Fınalda bilekti balýan jas sportshy Ersultan Muzapparovty jeńdi. Úshinshi orynda reseılik Roman Bobıkov. Bıylǵy birinshiliktiń jalpy júlde qory 20 mıllıon teńgeni qurady. Onyń ishinde 10 mıllıony jeńimpazǵa tıesili. 6 mıllıon ekinshi, 3 mıllıon teńge úshinshi oryn ıegerine tabystalady. Dástúr boıynsha altyn, kúmis jáne qola belbeýler de tabystaldy. Bıyl alǵash ret «jeńiske degen talpynysy úshin» nomınasıasy boıynsha 1 mıllıon teńge syıaqy taǵaıyndaldy. Atalǵan júldege jankúıerlerdiń ystyq yqylasyna bólengen tájikstandyq Dodahon Kýronalıev laıyq dep tanyldy. Jankúıerler de júldesiz qalmady. Kórermender arasynda Renault Logan avtokóligi oınatyldy.
«Álem Barysynda» Qazaqstan namysyn bes balýan qorǵady: tórt dúrkin álem chempıony jáne Qazaqstan Barysy jeńimpazy Aıbek Nuǵymarov, jas ta bolsa bolashaǵynan zor úmit kúttiretin Aıbat Seıten jáne Ersultan Muzapparov, bıylǵy Qazaqstan chempıondary Rýslan Ábdirazaqov jáne Nurdáýlet Jarylǵapov. Ábdirazaqov pen Jarylǵapov alǵashqy aınalymda jeńilse, Seıten ekinshi beldesýinde jeńilis qushty.
«Álem Barysy» osymen úshinshi ret ótti. 2014 jyly alǵashqy týrnırge 35 eldiń apaıtós balýany qatysty. Olardyń arasynda dzúdodan álem jáne Olımpıada chempıony chex Lýkash Krpalek, sambodan álem chempıony armenıalyq Garıbán Arýtún, dzúdodan álem chempıonatynyń júldegeri nemis Raımýnd Gırds, kýrashtan álem chempıony ızraıldyq Grıgorıı Rýdelson, alyshtan Azıa chempıony parsy Mýhammad Teımoýrı Sarah, Olımpıada jáne álem chempıonatynyń júldegeri kýbalyq Oskar Rene Vıdal Braıson jáne taǵy basqa ataqty balýandar boz kilemge shyqqan edi. Tartysty báseke nátıjesinde altyn belbeý men júz myń AQSH dollardy kýbalyq Braıson ıelendi. Ekinshi orynda Aıbek Nuǵymarov, úshinshi satyda reseılik Maksım Shıráev. 2014 jyly xalyqaralyq týrnır retinde tusaýy kesilgen «Álem Barysy» búginde qazaq kúresinen absolútti álem chempıonaty deńgeıine ósti. Byltyr Astanadaǵy «Barys Arenada» Aıbek Nuǵymarov «Álem Barysy» atansa, qazaq balýanyna aqtyq beldesýde laıyqty qarsylas bola alǵan grýzın sportshysy Gýram Týshıshvılı edi. Al úshinshi orynǵa Erjan Shynkeev jaıǵasty.
Jarystyń erejesine engizilgen keıbir ózgerister de boldy. Buǵan deıin kilemde úsh tóreshi: ortadaǵy jáne qaptaldaǵy qos tóreshi bolsa, endi boz kilemde jalǵyz maman tórelik etti. Sonymen qatar, jattyqtyrýshy burynǵydaı tóreshi sheshimine qarsylyq bildirip, qamshy laqtyrmady, beldesý barysynda kúmándi sheshim týyndaǵan jaǵdaıda ǵana vıdeo qaıtalaý ekranǵa shyǵaryldy. Barlyq beldesýlerdi tolyqtaı bas tóreshi Shalqar Jolamanov baqylady.
Álemniń túkpir-túkpirinen qatysýshylar Almatyǵa jarysqa birneshe kún qalǵanda jınaldy. Olardyń arasynda dzúdodan bıylǵy álem chempıony Gýram Týshıshvılı (Grýzıa), qazaq kúresinen álem chempıony Mýhsın Hısomıddınov (Ózbekstan), mońǵol ulttyq kúresiniń memlekettik «Lashyn» ataǵynyń ıegeri Serik Berdimurat jáne taǵy basqa nátıjeli sportshylar boldy. Aıta ketetin jáıt, bıylǵy chempıonatqa qatysqan elderdiń barlyǵy buǵan deıin qazaq kúresiniń saıystaryna qatysyp júr, tek Norvegıa eli alǵash ret ulttyq kúresimizde baǵyn synady.
Jarys sharty boıynsha barlyq qatysýshylarǵa qazaq kúresine arnalǵan sporttyq kúrteshe men aıaq kıim berildi. Balýandarǵa fotossessıa uıymdastyrylyp, sheteldik tóreshilerge qazaq kúresiniń erejeleri boıynsha semınar ótkizildi. 1 jeltoqsan kúni saǵat «Alem Barysy» qatysýshylarynyń salmaq ólsheý rásimi jáne BAQ ókilderimen kezdesý ótkizildi.
Absolútti álem chempıonatyn tikeleı efırde «Qazaqstan», «Qazsport», túriktiń «TRT Avaz», Reseıdiń «Mach! Planeta» jáne «Boks TV» telearnalary kórsetti.
