Jumys sapary kezinde Almaty ákimi Baýyrjan Baıbek otandyq óndiriste shyǵarylǵan ári gazben jumys isteıtin 70 jańa avtomobılderdi kórdi. Qazirgi kezde qala polısıasynyń avtoparki kólikpen tolyq qamtylǵan, al bul vedomstvanyń jedel jumysyna oń yqpalyn tıgizetin bolady.

Qala polısıasynyń bastyǵy Serik Kúdebaev óziniń sózinde ár avtomobıldiń GPS-navıgatorymen jáne vıdeo-aýdıo fıksasıalarmen jabdyqtalǵanyn aıtty. Budan ózge, barlyq jol-patrýl qyzmeti planshettermen jáne tóskeýdelik vıdeoregıstratorlarmen qamtylǵan. Osynyń arqasynda hattamalar tek elektrondy varıantta jasalady, al keler jyldyń birinshi toqsanynda aıyppuldar tártip buzylǵan jerde banki kartasy arqyly birden tólenedi.

Megapolıs ákimi turǵyndardyq qaýipsizdigi qalamyzdy turaqty damytýdyń basty býyny bolyp tabylatynyn atap ótti.

«Qazirgi kezde biz qaýipsizdik salasyna ınformatızasıany keńinen tartýdamyz, ıaǵnı sybaılas jemqorlyqqa ákeletin adam faktoryn barynsha azaıtý úshin jańa tehnologıalardy engizýdemiz. Vıdeobaqylaý kameralarynyń sany artýda, maqsat aıyppul salýda ǵana emes, kólik qozǵalysyn tártipke shaqyryp, JKO azaıtýda. 3 jyl ishinde qalanyń jergilikti búdjetinen polısıany jabdyqtaýǵa jetkilikti qarjy bólindi, sondyqtan biz servıstik prınsıp boıynsha polısıadan jumys tıimdiligin arttyrýdy talap ete alamyz», - dedi Baýyrjan Baıbek.

Jalpy qala polısıasynyń materıaldyq-tehnıkalyq jaraqtanýy 87%-ǵa deıin jetti. Sońǵy úsh jyl ishinde 468 birlik qyzmettik kólik alyndy. Qalanyń barlyq aýdandarynda jergilikti búdjet esebinen móldir front-ofıster ashylady. «102» qyzmeti jetildiriledi, qazirgi kezde bulardaǵy operatorlar sany 2,5 ese, al olardyń jalaqysy 3 ese ósken.