Aqtóbede saltanatty túrde tuńǵysh McDonald’s meıramhanasy ashyldy.
- Memleket basshysynyń tapsyrmasymen Aqtóbe aglomerasıasyn damytý jumystary belsendi júrgizilip jatyr. Aqtóbe odan da kóp ınvestısıa tartatyn zamanaýı san qyrly damý ortalyǵyna aınalýda. Úlken qalanyń damýy men qurylýy shaǵyn jáne orta bıznestiń ósýimen, jańa bıznes jobalardyń qurylýymen qatar júredi. Búginde SHOB salasynda 135 myńnan asa aqtóbelik eńbek etedi, olar 370 mlrd teńgeden astam somaǵa ónim shyǵarǵan. Jańa meıramhana aqtóbelikterdiń tanymal demalys oryndarynyń birine aınalatynyna senimdimin,-dedi Aqtóbe oblysynyń ákimi Berdibek Saparbaev meıramhananyń ashylý rásiminde.
Aqtóbe - Qazaqstandaǵy álemge tanymal brendtiń meıramhanalary jumys jasap jatqan Astana, Almaty men Qostanaı qalalarynan keıingi tórtinshi qala.
- Búgin Qazaqstandaǵy 13-shi jáne Aqtóbede birinshi McDonald’s-ti ashyp otyrmyz, meıramhana qala turǵyndary men qonaqtaryn tartatyn ortalyqqa aınalady dep úmittenemiz. McDonald’s áleýmettik jaǵynan jaýapty kompanıa retinde Qazaqstanda belsendi ómir saltyn engizýdi, bilim berý, mádenıet pen sporttyq baǵdarlamalardy belsendi túrde qoldaıdy. Biz 25,5 mln teńgege qaıyrymdylyq kómek kórsettik. Qazaqstandaǵy McDonald’s saýda belgisi Qazaqstan Respýblıkasynyń ulttyq paraolımpıada komıtetiniń demeýshisi bolyp tabylady, - dedi McDonald’s franshızasynyń Qazaqstandaǵy qojaıyny Qaırat Boranbaev.
Jalpy alańy 470 sharshy metr bolatyn meıramhananyń ishinde 96 jáne jazǵy alańynda 64 otyratyn oryn bar. Meıramhana kólik júrgizýshilerine qolaıly bolý úshin ishki perımetrler boıynsha McDrive júıesimen jabdyqtalǵan. Sonyń arqasynda kólikten shyqpaı-aq tapsyrys berip, tólem jasap, alýǵa bolady. Kólik jiberý múmkindigi ortasha alǵanda saǵatyna 100 mashınaǵa deıin jetedi.
Meıramhanada kishkentaı kelýshilerge erekshe kóńil bólingen. Balalar úshin labırınt, ınteraktıvti edeni, ksılovony, ústel oıyndary men basqa da oıyn-saýyqtary bar arnaıy oıyn bólmesi jabdyqtalǵan.
