Shaǵyn jáne orta kásipkerlik – memlekettik ekonomıkanyń damýyna úles qosatyn asa mańyzdy baǵyttarynyń biri. Iaǵnı, shaǵyn jáne orta kásipkerliktiń damýy - áleýmettiń ál-aýqaty artyp, turmys sapasy jaqsarýyn bildiredi. Ekonomıka turaqty bolady. Sondyqtan bolar bul salany damytý úshin memleket tarapynan birqatar jumystar atqarylyp jatyr. Sondaı sharalardyń biri – bızneske arnalǵan ashyq sıfrlyq platforma (Ismet.kz).
Sıfrlyq alańǵa toqtalmas buryn, eldegi shaǵyn jáne orta kásipkerliktiń jaı-kúıin aıtyp ótsek. Ekonomıserdiń dereginshe, shaǵyn jáne orta kásipkerlik arqyly jumyspen qamtylǵandar elimizde 31 paıyzdy quraıdy. Al álem elderine kóz júgirtsek, bul kórsetkish AQSH-ta – 53 paıyz, Japonıada – 70 paıyzdan asady. SHOB-tyń ınovasıalyq belsendiligine keler bolsaq, Statısıka komıtetiniń júrgizgen saýalnamasyna sáıkes, 19 356 shaǵyn kásiporynnyń 1007-de ǵana ınovasıamen jumys isteıdi. Al paıyzdyq kórsetkishter boıynsha nebári 5,2 paıyzdy quraıdy. SHOB sýbektileriniń ulttyq ekonomıkanyń túrli salalaryndaǵy úlesin atap óter bolsaq, búginde shaǵyn jáne orta kásipkerlik sýbektileriniń 42 %-ǵa jýyǵy bólshek saýda salasynda eken. Al aýyl sharýashylyǵynda 18%-y, qurylysta 2,7%-y, kólik pen baılanysta 7,6%-y, qyzmet kórsetý salasynda 26%-y bolsa, ónerkásipte nebári 2,9 paıyz eken.
Atalǵan salany damytýǵa arnalǵan Ismet.kz jobasy 2018 jyldyń jazynda iske qosyldy. Bul elimizdegi jetekshi baılanys operatory – «Qazaqtelekom» AQ-nyń bastamasymen júzege asýda. «Qazaqtelekom» AQ bıznes-sheshimder jáne ınfokommýnıkasıa departamentiniń dırektory Qýat Sandalovtyń sózinshe, aıtýly joba bıznes salasyndaǵy kedergiler joıýǵa baǵyttalǵan.
«Biz shaǵyn jáne orta bıznestegi birneshe máselelerge nazar aýdardyq. Olardyń biri – prosesti avtomattandyrýdyń tómen deńgeıi bolyp otyr. Al Ismet.kz-tiń áleýeti óte joǵary. Bizdiń platforma arqyly qoldanýshylar men jetkizýshilerdi elektrondy komersıaǵa tartqymyz keledi. Ol barlyq jaǵynan yńǵaıly, mundaı jaıly alań áli oılap tabylǵan joq», – deıdi Q. Sandalov.
Onyń aıtýynsha, sıfrlyq platformanyń basty tapsyrmasy – bul ekojúıelerdi qurý. Artynsha shaǵyn jáne orta kásipkerlik úshin sıfrlyq qatynas jasalady.
Jobanyń negizgi maqsaty - zamanaýı bıznestiń jeńil jáne qoljetimdi alańyn qurý. Portal jańa múshelerdi tirkeý jáne qyzmetterge tapsyrys berý úshin ashyq. Kasany, elektrondy qujat aınalymyn jáne býhgalterlik esepti avtomattandyrý boıynsha qyzmetter qoljetimdi. Klıentter qyzmetter týraly pikirler qaldyra alady jáne olarǵa baǵalaýdy bere alady. Blogtar bóliminde qyzmetterdi damytýǵa, ózińizdiń bıznesińiz týraly aıtýǵa, basqa qatysýshylardyń pikirin jınaýǵa jáne sońǵy úrdisterdi bilýge bolady.
Ismet.kz-tiń artyqshylyqtary: ýaqyt pen tranzaksıa baǵasyn qysqartady; jańa naryqtyq múmkindikterdi ıgerýge múmkindik beredi; bıznestiń básekege qabilettiligin arttyrady, bilikti kadrlarmen qamtamasyz etedi. Sıfrlyq platforma arqyly satý kólemin arttyrýǵa, boljanatyn kedergilerdi ońaı basqarýǵa jáne proaktıvti bıznesti qurýǵa bolady. Oǵan qosa, ınvestor men seriktes jáne sapaly mamandar tabýǵa bolady.
