Qyrǵyzstan Joǵarǵy Keńeshiniń burynǵy tóraǵasy Ahmatbek Keldibekov, sondaı-aq saıasatkerler Ázimbek Beknazarov jáne Keńeshbek Dúıshebekov eks-prezıdent Almazbek Atambaev pen rnyń «Aprel» telearnasyn sotqa berdi.
Atalǵan telearnanyń tilshisine suhbat bergen Qyrǵyzstannyń burynǵy prezıdenti joǵarydaǵy úsh azamatty «jemqorlyqqa qatysy bar» dep atady. Atambaevtyń aıtýy boıynsha, Joǵarǵy Keńeshtiń tóraǵasy Keldibekov eldi talan-tarajǵa salýǵa jol berdi, ol spıker bolǵan kezde parlamentte qabyldanǵan zańdar álsiz boldy, sony paıdalanǵan urylar eldi tonady. Oǵan tikeleı Keldibekovtiń ózi kináli. Sóıtip, qazir ózderi de ábden baıyp aldy» dep málimdedi.
–Endi olar maǵan qarsy shyǵyp, «Atambaevtyń ózin sottaý kerek» dep jatyr. Meni emes, memlekettiń baılyǵyn tonap, tez baıyǵan osyndaı múltımıllıonerlerdi sottaý qajet. Qazirgi prezıdenttik bılik osyndaı ury-qarylarmen aýyz jalasyp otyr. Tipti olardy jasyryn qoldaıdy, – dedi qyrǵyzdyń eks-prezıdenti Almazbek Atambaev.
Prezıdenttik taqtan túskennen keıin elde Atambaevty jek kórýshilerdiń sany arta túskendeı. Tipti qyrǵyz elıtasy arasynda da teketires kúsheıip barady. Almazbektiń birjaqty aıtqan osyndaı pikirleri árıne saıasatkerlerdiń narazylyǵyn týdyrýda.
Biraq Atambaev Qyrǵyzstan úshin basty másele – halyqtyń birligi men turaqtylyq jáne beıbitshilik dep sanaıdy.
–Qudaı saqtasyn, eger qazir 2005 jylǵy naýryz nemese sáýir tóńkerisi qaıtalanatyn bolsa, onda halyqqa óte qıyn bolady. Odan tek Ázimbek Beknazarov pen Keńeshbek Dúıshebekov qana utady, solar ǵana paıda tabady, – deıdi Atambaev.
Dál osy sózderi úshin qyrǵyzdyń eks-prezıdenti men onyń «Aprel» telearnasyn sotqa bergen úsheý ózderine dálelsiz til tıgizgeni úshi 257 myń dollar talap etip otyr. Aldaǵy kúnderi bolatyn sotta qaı jaq jeńip shyǵatynyn ýaqyt kórsetedi, biraq eki tarap ta qaıtpaıtyn sekildi.
Aıta ketý kerek, Atambaevqa aıyp taǵyp otyrǵan qyrǵyzdyń úsh saıasatkeri eks-prezıdenttiń óz ádisin osylaı ózine qarsy qoldanbaq. Buǵan deıin Almazbek Atambaev ózi jaqtyrmaıtyn BAQ ókilderin «arandatýshylar» dep ataǵany belgili. Onyń prezıdenttik bıligi tusynda eldegi «Azattyq», «Zanoza» jáne taǵy basqa basylymdar jabylyp, birqatar jýrnalıser qýdalaýǵa ushyrady.
Qazirgi prezıdent Soronbaı Jeenbekovtyń komandasynda Atambaevtyń birde - bir adamy qalǵan joq. Olardyń birqatary jemqorlyq áreketteri úshin ustaldy, qamaldy, sottaldy. Tipti onyń Sosıal-demokratıalyq partıasy ekige bólinip ketti. Olardyń birqatary Atambaevty jaqtasa, jartysy qazirgi prezıdenttik bılikti qoldap otyr.
Al Atambaevtyń qazirgi áreketi ózin aqtaý úshin jasalynyp jatqan aqyrǵy jantalas sekildi...
