Birneshe kúnnen beri Nazarovtarǵa nazyn aıtyp jatqandar bar.
♦Nazarovtardyń nazaryna: "Álemniń, álde kishigirim tujyrymnyń chempıonysyzdar ma?"
«Ardaq jeke klýbyn jarnamalap qalǵysy keldi, Beıbittiń boıynan jeńiske degen jiger minez baıqalmady, halyqtyń 90 paıyzy renjýli» degen sıaqty keıis. Keıbir áriptesterdiń bul pikirimen kelise almaımyn.
Birinshiden, Ardaq Nazarovqa eshqandaı jarnamanyń qajeti joq. Eger Beıbittiń boıynan jeńiske degen jiger minez baıqaı almasańyz, onda jekpe-jekti qaıtadan bir qarap shyǵyńyz. Halyqtyń 90 paıyzy renjýli ekenin sanap kórdińiz be? Álgindeı oı aıtqan kisiler jigitterdiń jarys aldyndaǵy daıyndyǵyn kórdi me eken? Kúmánim bar. Eger kórgen bolsa, dál osylaı demes edi. Tasadan tas laqtyrǵansha «Álem Faıters» klýbynyń mekenjaıyn bilseńiz, sonda baryp oı-pikirińizdi sportshylardyń betine aıtyńyz. Jáne sol jerde qanshama qazaq jastarynyń tálim-tárbıe alyp, túzý jolda júrgenin baıqaısyz.
Jalpy jekpe-jekte júrgen jigitterdiń jeńisine ábden etimiz úırenip alǵan. Jeńile qalsa, jerden alyp jerge salamyz. Eger til qyshyp bara jatsa, basynan baqaıshyǵyna deıin úlde men búldege oranǵan basketbol men hokeıshilerdi nege synamaısyz? Eger úkimet solarǵa bólingen qarjynyń úshten bir bóligin ǵana erejesiz jekpe-jekke aýdarsa, sportshylarymyz taý qoparatyn edi. Ardaqtyń armany – qazaq jastaryn UFC tórine shyǵarý. Kók baıraǵymyzdy bıikten jelbiretý. Sol maqsatta ter tógip júr.
Esterińizde bolsa, birneshe jyldar buryn «Álem Faıters» pen «Alash Praıd» sport klýbtary kóptegen jarystar ótkizip, qarsylastaryn qoǵadaı japyratyn. Qazir Danıar Qasqaraýov pen Ardaq Nazarov aǵalarymyzdyń jarys ótkizýdegi tájirıbesi artty. Álemge belgili tulǵalarmen tanysyp, qoıan-qoltyq jumys jasaı bastady. Endeshe qazaq jigitteriniń UFC shyńna shyǵatyn kúni alys emes. «Bolar eldiń balasy birin-biri batyr demeýshi» ma edi. Endeshe jigitterdi jasyta bergenshe jigerin janyp, namysyn qamshylaıyq! Titan FC týrnırinde jeńilis tapqan sportshylarǵa eńse túsirmeńder deımiz. «Erinbeı eńbek etkenge baqyt qashanda basyn ıedi». Senderderdiń alatyn asýlaryń áli alda! Biz sendermen maqtanamyz! Qazaqtyń batyr uldary jasasyn!
Jandos Aıtbaıdyń feısbýk paraqshasynan
