Oblys ákimi Berdibek Saparbaevtyń aqtóbelik daryndy balalarǵa arnalǵan jańajyldyq shyrshasy ótti. Jekpe-jek saraıynda ótken merekelik keshke oblystyń 213 daryndy oqýshysy qatysty.
Balalar saraıdyń keń zalynda ornatylǵan jasyl shyrsha mańynda bı bılep, án shyrqady. Ertegiler eline saıahat jasap, «Alısa ǵajaıyptar elinde» atty jańajyldyq qoıylymnyń kýási boldy. Dástúr boıynsha jańajyldyq shyrshanyń shamdary jaǵylǵan soń oblys ákimi Berdibek Saparbaev balalardy kele jatqan jańa jyl merekesimen quttyqtap, aq tilegin jetkizdi.
— Aınalaıyn, balalar, Jańa jyl — sizderdiń asyǵa kútetin merekelerińizdiń biri. Búgingi jańajyldyq shyrshanyń ereksheligi — buǵan bizdiń Aqtóbeniń eń jaqsy oqıtyn oqýshylarymen qatar, halyqaralyq, respýblıkalyq konkýrstardyń jeńimpazdary qatysyp otyr. Sizder — bizdiń bolashaǵymyzsyzdar. Biz sizderdiń qatarlaryńyzdan kem bolmaı, bilimdi, tárbıeli, mádenıetti bolyp óskenderińizdi qalaımyz.
Aqtóbede sońǵy 10 jylda 5000-ǵa jýyq bala kóptegen olımpıadalardyń jeńimpazy atandy. Sender solardyń jalǵasysyńdar. Búgingi tańda óńirde salynyp jatqan mektep, sport nysandary, mádenı oryndardyń barlyǵy tek sizder úshin. Biz sizderdiń zaman talabyna saı jańa tehnologıalardy, jańa baǵdarlamalardy ıgerip, bolashaqta elimizdi damyǵan 30 eldiń qataryna enýi úshin óz úlesterin qossyn degen nıette jumys jasap jatyrmyz. Men sizderdiń barlyǵyńyzdy oblys basshylyǵynyń atynan kele jatqan Jańa jyldaryńmen quttyqtaımyn. Jaqsy oqyńdar! Ata-analaryńdy, ustazdaryńdy tyńdańdar. Sportpen, ónermen shuǵyldanyńdar. Sol kezde jerles aǵalaryń Dımash Qudaıbergen sekildi elimizdiń atyn álemge tanytasyńdar, — dedi oblys ákimi.
Shara barysynda oblys ákiminiń atynan balalarǵa syılyqtar tartý
etildi. Táttilermen qatar, túrli oıynshyqtar, aqyl-oıdy damytýǵa arnalǵan konstrýktorlar taratyldy. Merekelik sharaǵa qatysýshylardyń biri — Shalqar qalasynyń №5 mektep-lıseıiniń 6-synyp oqýshysy Naıman Hamıt.
— Oblys ákiminiń shyrshasyna alǵash qatysýym. Búgingi merekelik sharaǵa qatysý kimge bolsa da úlken mártebe dep bilemin. Óte qýanyshtymyn. Kóńil kúıim de tamasha. Árıne, bul oqýdaǵy jetistikterimniń arqasy. Bolashaqta elimizdiń atyn álemge tanytar dáriger bolǵym keledi. Ol úshin búginnen bastap oqý kerek, — deıdi Naıman.
Oblystyq bilim basqarmasynyń basshysy Lázzat Orazbaevanyń aıtýynsha,óńirde jańa jyldyq shyrshalar 24 jeltoqsannan bastalǵan jáne ol 31 jeltoqsanǵa deıin jalǵasady.Sondaı-aq oblystyń bas ustazy bıyl oblystyq bilim basqarmasynyń uıymdastyrýymen 31 jeltoqsan kúni saǵat 10.00-de «Balalarǵa qýanysh syıla!» atty keń aýqymdy aksıasy ótetindigin aıtty. Aksıa aıasynda erekshe bilim berýdi qajet etetin 3626 balaǵa bir mezette memlekettik mekeme ókilderi, Aıaz ata men Aqshaqar arnaıy baryp syılyqtar tabys etedi
