Oblys ákimi Berdibek Saparbaev Baıǵanın aýdanyndaǵy Qaratóbe ken ornyndaǵy problemalyq máselelerdi sheshý boıynsha keńes ótkizdi.

Ekologıa departamentiniń, tabıǵı resýrstar jáne tabıǵat paıdalanýdy retteý, ındýstrıaldy-ınnovasıalyq damý basqarmalarynyń, tótenshe jaǵdaılar departamentiniń, «Zapkaznedra» aımaqtyq ınspeksıasynyń, sondaı-aq Baıǵanın aýdany ákimdiginiń basshylary ken ornyndaǵy aǵymdaǵy jaǵdaı, ekologıalyq qaýipsizdikti qamtamasyz etý boıynsha qabyldanǵan jáne qajetti sharalar týraly baıandady. Búgingi kúni jaǵdaı turaqty, turǵyndarǵa jáne ekologıa qaýipsizdigine qatysty qater joq. Keńes qorytyndysy boıynsha oblys basshysy jaýapty memlekettik organdarǵa jergilikti atqarýshy bıilikpen birge ken ornynda kún saıyn monıtorıń júrgizýdi tapsyrdy.

- Qaratóbe ken ornyndaǵy ahýal erekshe baqylaýda. Biraq kóptegen túıindi máselelerdiń sheshýi ortalyq memlekettik organdardyń quzyretinde. Sondyqtan bul máseleniń sheshimi boıynsha biz qysqa merzimde birqatar naqty usynystardy daıyndaıtyn bolamyz, — dep atap kórsetti oblys ákimi.

«Qaratóbe» munaı ken ornynyń operatory — «Qaratóbe Interneshnl Oıl Kompanı» JSHS qyzmetiniń zańdylyǵy týraly is 2009 jyldan beri ártúrli sot satylarynda, onyń ishinde Parıjdegi arbıtrajdyq sotta qaraldy. Sol ýaqyttan beri ken orny is júzinde ıesiz qaldy, sońǵy jyldar aýmaǵynda apatty uńǵymalardan turaqty túrde munaı quıyp alý derekteri oryn alyp keldi.