Jekpe-jek sport saraıynda aqtóbelik oqýshylar úshin oblys ákimi atynan jańajyldyq shyrsha ótkizildi. Kóńildi keshke áleýmettik jaǵynan az qamtylǵan jáne kópbalaly otbasynan shyqqan, sondaı-aq túrli jetistikterimen mektep mereıin asqaqtatyp júrgen 200-ge jýyq oqýshy jınaldy.
Merekelik sharada oqýshylar jasyl shyrsha mańyna toptasyp, án shyrqap, bı bıledi. Olar «Alısa ǵajaıyptar elinde» atty merekelik qoıylymdy tamashalap, ertegiler eline saıahat jasady. Ertegi keıipkerleri keshtiń kishkentaı qonaqtaryn ózderine tez baýrap aldy. Dástúr boıynsha balalar Aıaz ata men Aqshaqardy ortaǵa alyp, sıqyrly taıaqshamen shyrsha shamdaryn jaqty. Sodan keıin olar kóńildi baıqaýlar men vıktorınalyq oıyndarǵa belsene qatysty.
Budan keıin oblys ákimi Berdibek Saparbaev balalarǵa aq tilegin, ystyq lebizin jetkizdi. Oqýshylardyń merekelik keshine oblystyq máslıhattyń hatshysy Sánıa Qaldyǵulova da keldi.
— Aınalaıyn, balalar! Barlyǵymyzdyń, ásirese sizderdiń eń jaqsy kóretin, asyǵa kútetin merekelerińizdiń biri — Jańa jyl. Óıtkeni kishkentaı baladan, eńkeıgen qarıaǵa deıin Jańa jyldan ózine jaqsylyq, ózgerister kútedi. Mine, sizder de Aıaz ata, Aqshaqarmen birigip, 2019 jyldy kútip alýǵa keldińizder. Sizder úshin 2018 jyl jaman bolǵan joq. Sabaqty jaqsy oqydyńdar, tártipti boldyńdar. Aldaǵy ýaqytta da sportpen, ónermen aınalysyp, ata-ananyń, ustazdaryńnyń aıtqanyn tyńdap, sabaqty jaqsy oqý, ózgelerge úlgi, ónege kórsetý — sizderdiń basty mindetteriń. Sizder neǵurlym bilimdi, tárbıeli bolsańyzdar, bolashaqta úlken azamat bolyp, elimizdiń damýyna úles qosasyzdar, — dedi Berdibek Saparbaev.
Shyrsha merekesinde oblys basshysy árbir balaǵa 20 myń teńgeniń sertıfıkaty men tátti syılyqtar usyndy. Kesh qonaqtaryna Jyl ıesi beınelengen jumsaq oıynshyqtar da syıǵa tartyldy.
Arýjan Úsinǵalıeva, Aqtóbe qalasyndaǵy №67 orta mekteptiń 7-synyp oqýshysy:
— Osyndaı záýlim saraıda ótip jatqan merekege kelgenime qýanyshtymyn. Bizderge qýanysh syılap, syılyq berip jatqan Berdibek aǵaǵa úlken raqmetimdi aıtamyn. Qazir men mektebimde bı úıirmesine qatysamyn. Bı bılegendi jaqsy kóremin. Bolashaqta túrli baıqaýlarǵa qatysyp, mektebimniń mereıin kóteretin bolamyn.
Álisher Jańbyrbaev, Aqtóbe qalasyndaǵy M.Arynov atyndaǵy Qarǵaly qazaq orta mektebiniń 6-synyp oqýshysy:
—Úlken shyrshany alǵash ret kórip turmyn. Oblys ákimi atynan uıymdastyrylǵan bul merekege qatysatynymdy estigende, erekshe qýandym. Qazir men grek-rım kúresinen túrli jarystarǵa qatysyp júrmin. Birneshe ret respýblıkalyq baıqaýlardan júldemen oraldym. Bıyldyń ózinde Qostanaı, Batys Qazaqstan oblystarynda ótken jarystarǵa qatystym. Bul oraıda men jattyqtyrýshym Jasulan Qulybaevqa erekshe alǵysymdy bildirgim keledi. Oblystyq bilim basqarmasy Jańa jyl qarsańynda, ıaǵnı bıyl 31 jeltoqsan kúni saǵat 10.00-de «Balalarǵa
qýanysh syıla!» atty keń aýqymdy aksıanyń ótetinin jarıalady. Basqarmanyń bas mamany Fatıma Aıtbaevanyń aıtýynsha, aksıa aıasynda erekshe bilim berýdi qajet etetin 3626 balany memelkettik mekeme ókilderi Aıaz ata men Aqshaqarmen birge quttyqtap, syılyq beretin bolady.
