Qaraǵandyda adam ólimimen aıaqtalǵan jappaı tóbeleske qatysty Aısultan Jaqypov áleýmettik jelidegi paraqshasynda jazba jarıalap, "iske núkte qoıyldy deı berýge bolady" - deıdi.

"Búgin jyl bastalǵannan beri qolymyzǵa semser almasaq ta, smartfonymyzdy alyp «batyrlyq» tanytqan, at erttemesek te, dıvanymyzdy qamshylatqan, dúıim eldi dúr silkindirgen, qoǵamda úlken alańdaýshylyq týǵyzǵan qaraly oqıǵaǵa, ıaǵnı «Drevnıı Rım» meıramhanasyndaǵy tóbeleste qaza bolǵan Raqymjan baýyrymyz jaıly máselege núkte qoıyldy dep aıta berýge ábden bolady.
Búgin Jeksen Ábdirahmanov aǵamyz bastaǵan qoǵam belsendilerimen armán etnosynyń aqsaqaldary kezdesti. Bul kezdesýde isti bolyp jatqan taraptyń, ıaǵnı meıramhana ıesiniń ákesi de (eki kúdiktiniń atasy) boldy. Ekinshi tarapta marqum baýyrymyzdyń ákesi Baqytjan boldy. Bılik ókilderinsiz, eki taraptyń úlkenderi, belsendiler bir saǵattaı otyryp, ortaq mámilege keldik. Armán aqsaqaldary da aldymen qaıǵyly qazaǵa baılanysty ózderiniń kóńilin bildirip, sýyt habardy estigennen bastap-aq birge ekendigin aıtty. Bolǵan jaıdyń ózekti órteıtin ókinish, orny tolmas qaıǵy ekendigin kóńil aıtýshy tarap sóz arasynda birneshe márte tilge tıek etti. Shekara asyp ketken basty kúdikti Narekti ustaýǵa bar kúshterin salǵan, onyń tizgindelýine yqpal etken tarap naq osy armándar jaǵy. Biz de óz kezegimizde baz bireýler aıtyp júrgendeı ultaralyq arazdyq qozdyrý, nemese basqa da aqylǵa syımaıtyn áńgimelerdiń múldem orynsyz ekendigin aıttyq. «Jaman ult bolmaıtyndyǵyn, jaman adam bolatyndyǵyn» túsinetinimizdi jetkizdik.

Sózdiń qysqasy, kináliler jazadan qashyp qutylmaıdy jáne onyń qatań bolatyndyǵyna bek senimdimiz. Sebebi, buǵan quzyrly organdar kepil bolatyndyǵyn aıtqany esterińizde. Al, endi eki taraptyń arasyndaǵy barlyq máselelerdiń óz sheshimin tapqanyna kýá boldym. Baqytjan aǵamyz «Men ólgen balamdy saýdaǵa salmaımyn. Bastysy el tynysh bolyp, bassyzdyq oryn almasyn» dep, bul máselege núktesin qoıdy.

Bul jaıly endigi bizdiń de shýyldaı beretin jónimiz joq. İs qatań baqylaýda, kináliler tıisti jazasyn alady. Osymen sóz tamam", - deıdi Aısultan Jaqypov.