Egemendiktiń kóginde
Uly dalanyń jerinde
Máńgiliktiń elinde
Bilmedim atyn, tegin de
Qutyrǵan bir baı bopty.

Jıp-qarýy saı bopty,
Urt-murty da maı bopty,
Tekten ádirem qalǵyrdyń
Qatysýymen Arqada
Jan túrshigerlik jaı bopty!

Jańaǵy ıttiń balasy,
İshine syımaı alasy,
Dúnıege toımaǵan 
Kóziniń aǵy-qarasy,
Júreginde bartyn-dy
Nápsiqumar jarasy,
Bar lázzatty kórgen soń
Taýsylyp aıla-sharasy,
Tabıǵat, Jer-Anada
Bar edi qandaı nalasy?
Qulqynnyń quly bolǵan soń,
Qasıetti de, kıeli,
Kıikti atty, qarashy!

Ol daǵy, meıli, janýar,
Shyǵar-shyqpas jany bar.
Alaıda ony kúzetken,
Talaılardy túzetken,
Azamatymyz taǵy bar.
Arasha túsem dep kıikke
Qanisherdiń qolynan
Oqqa ushqan shaǵy bar.
Artynda bala-jary bar.
Endi mundaı azamat
Qaı anadan tabylar?
Aǵaıyn, týys, baýyry,
Ádildik izdep tynbastan
Organdarǵa sabylar.

Alaıda, haıýan túgili
Adamdy atqan Aramnyń
Myqty-myqty mańy bar,
Jazalanbaıtyn zańy bar,
Arqasynda aqshanyń 
Araılap atar tańy bar,
Sybaılastary turǵanda
Mańdaıynyń baǵy bar,
Múmkin osy zor qylmys
Sol kúıinde jabylar,
Bálkim aqqa jaq bolyp
Shyndyq alaýy jaǵylar.

Jaqsy men jaman isińniń
Ózińe qaıta keletin
Ereksheligi taǵy bar.
Kúnderdiń kúni týǵanda
Qanypezer ańshynyń
Ózi de qara jamylar!

Ata jolymen júrmegen,
Qıyn ómir súrmegen,
Kók tútindi úrlegen,
Meshitke bir kirmegen,
Sana-paıymy kirlegen,
Óz elin boqtap, tildegen,
Ústine shúberek ilmegen,
Urpaǵyń ósip keledi
Batyrlar jyryn bilmegen!

PS: Tárbıe kózi emes pe edi
Ertegi, ańyz, jyr degen?!

Jambyl Tilep