Álemge áıgili ári aqyldy saıt Wikipedia-ǵa 35 myń maqala jazyp, oǵan 3 mıllıonnan asa túzetýler engizgen kim ekendigi belgili boldy. Sheteldik CBS telearnasy sol avtor jaıynda sújet túsiripti, dep jazady Qamshy.kz aqparat agenttigi.

Búkil elge tanymal aqyldy saıt-ensıklopedıadaǵy 35 myń maqalanyń avtory jáne oǵan úsh mıllıonnan asa túzetýler engizgen, 35 jastaǵy amerıkalyq Stıven Prúıtt eken. Ol Reddit saıtynda birden tanymaldylyqqa ıe boldy.

Prúıtt Vırgınıada ata-anasymen birge turady. Ol AQSH-tyń Keden jáne shekara qorǵaý qyzmetiniń arhıvimen jumys isteıdi jáne tarıhty óte qatty jaqsy kóredi eken. Prúıttiń aıtýynsha, áriptesteri ony "esinen adasqan" dep ataıtyn kórinedi. Tipti, birge turatyn ata-anasy da balasynyń qyzyǵýshylyǵyn kórip, ony "esi durys emes" dep kúmándanǵan. Prúıtt kúndelikti álemdegi eń tanymal elektrondy ensıklopedıany redaksıalaý úshin úsh saǵat ýaqytyn jumsaıdy eken. Bir qyzyǵy, ol óziniń jumysyna bir tıyn da almaı, Wikipedia saıtynda tegin isteıdi.

Avtordyń aıtýynsha, Wikipedia saıty úshin jumys isteýdiń ózi ony rahatqa bóleıdi.

-Meniń anam KSRO-da týyp-ósken, sondyqtan men aqparat bostandyǵynyń qanshalyqty qundy ekenin bilemin, - deıdi Prúıtt.

Ol 2003 jyldan beri atalmysh saıttaǵy maqalalardy redaksıalap keledi. Osy kúnge deıin dál ol sıaqty bul saıtqa eshkim túzetýler engizbegen. Onyń baqtalasy bolady-aý degen avtor 900 myń túzetýler engizgen. 2017 jyly Time jýrnaly Prúıtti ınternetti eń yqpaldy 25 adamnyń qataryna qosqan, sondaı-aq, ol tizimde Donald Tramp pen Kım Kardashán da bar.

CBS telearnasyndaǵy sújet jaryq kórgenge deıin Prúıtt belgili tulǵa emes edi, keıinnen onyń tanymaldylyǵy birden artyp, Reddit saıtynda juldyzǵa aınaldy. Atalmysh portalda Prúıttiń eńbegin talqylaǵan túrli materıaldar jaryq kóre bastady. Internet qoldanýshylary ony qazirgi kúnniń «batyry» dep taýyp, Wikipedia saıtyna emes, qarjyny Prúıttiń ózine bólý kerektigin aıtady. Sonymen qatar, jeli qoldanýshylary álemge áıgili elektrondy ensıklopedıada avtor týraly birde-bir shaǵyn maqala joq ekendigin tilge tıek etti.

Aıta keteıik, búginde Wikipedia saıtynda 6 mıllıonǵa jýyq materıal bar. 

Usynǵan: Nazerke Labıhan