Alty jylǵa bas bostandyǵynan aıyrylǵan ánshi Gaýhar Álimbekova sot sheshimi kúshine engenshe qolhatpen bosatyldy, - dep habarlaıdy Qamshy.kz aqparat agenttigi Tengrinews.kz portalyna silteme jasaı otyryp.

"Búgin, 2019 jyldyń 4 aqpanynda Almatynyń Almaly aýdandyq soty Álimbekovanyń advokatynyń ony qamaýda ustaý týraly bultartpaý sharasyn sot úkimi zańdy kúshine engenge deıin qolhatpen bosatý týraly ótinishin qanaǵattandyrdy. Sot Álimbekovanyń sotqa deıingi tekserý barysynda bultartpaý sharalaryn buzbaǵanyn, turǵylyqty mekenjaıy bar ekenin jáne osyǵan deıin sotty bolmaǵanyn eskerdi", - dep habarlady sottyń baspasóz qyzmetindegiler.

Eske salaıyq, elimizge tanymal ánderdiń avtory, ánshi Gaýhar Álimbekova 30 qańtarda alaıaqtyq úshin 6 jylǵa bas bostandyǵynan aıyrylǵan bolatyn.  Keıinirek ánshiniń advokaty Jumaǵalı Zınelov istiń mán-jaıyn aıtyp bergen edi. Advokat sot úkimimen kelispeıtinin jáne taıaý arada apelásıalyq sotqa aryz túsiretinin málimdedi.

Aıta keteıik, ánshiniń "Aq kelin", "Kóktemge hat", "Jas kelin", "Qyz sezimi", "Oralshy mahabbat", "Aqmaralym" ánderi jurtshylyqqa keńinen taralyp, tanymal bolǵan. Onyń ánine jazylǵan óleńderdi tanymal estrada juldyzdary oryndaǵan.