Elimizde dúnıeden ótken árbir adam zeınetaqy qoryndaǵy qarjysynyń esebinen jerlenedi.

Al, qaıtys bolǵan kisiniń jınaqtalǵan aqshasy bolmasa, ony aqtyq saparǵa shyǵaryp salǵan týystaryna úkimet tarapynan bir rettik eń tómengi járdemaqy qarastyrylǵan eken. Egerde, marqum ómiriniń sońyna deıin eńbektenip ótse, zeınetaqy qorynyń ókilderi salymshynyń et jaqyndaryna jınaqtalǵan somany tolyq ótep alýǵa múmkindik bar, deıdi. Alaıda, is júzinde ol aqshanyń júzden bir bóligi ǵana tólenedi eken. Bul týraly Qamshy.kz aqparat agenttigi Eýrazıa birinshi arnasyna silteme jasap habarlaıdy.

Dúnıeden ótken adamnyń zeınetaqy qoryna jıǵan qarjysy týystaryna tolyq qaıtarylady. Bul zańmen bekitilip, taıǵa tańba basqandaı anyq etip kórsetilgen. Alaıda, qoǵam belsendisi Jumamurat Shámshi bul oımen múldem kelispeıdi. Sebebi, onsyz da qaıǵydan qara jamylǵan otbasy zeınetaqy qoryndaǵy qarjyny alýǵa barǵan kezde, ol somanyń kóleńkesin de kórmeısiń, deıdi. Qor ókilderi "qaıtys bolǵan adamnyń jıǵan-tergeni memleket menshigine ótip ketti" dep jaýap beretin kórinedi.

“Ókinishke qaraı ol qyp-qyzyl ótirik. Meniń bir apaıym ómir baqı jumys istegen. Sol kisi zeınetkerlikke jetpeı 58 jasynda dúnıeden ozyp ketti. Jalǵyz uly bar edi baryp suraǵan ǵoı dep barsa keshiresiz siz ol adam emessiz bul memlekettik búdjetke ótip ketedi dep bir tıynda bermegen. Sol sekildi bizde kúnde bir zań shyǵady da biraq ol oryndalmaıdy ókinishke qaraı", - qoǵam belsendisi Jumamurat Shámshi.

Al, zeınetaqy qory ókilderiniń sózine sensek elimizde ómirden ótken adamnyń jıǵan-tergeni esebinen bir rettik járdemaqy qarastyrylǵan. Al, qordalanǵan qarjyny tolyq qaıtaryp alý úshin týystary 6 aıdan soń, et jaqynynyń qaıtys bolǵany jónindegi qujat pen muragerlik anyqtamasyn ótkizip, aqshany alý jóninde ótinish berý qajet eken. Sondyqtan qoǵam belsendisiniń sózi negizsiz, - deıdi. 

"BJZQ jınaqtalǵan azamattardyń jınaqtary ósıet boıynsha nemese muragerlikke qaldyrylady, eger azamat qaıtys bolǵan jaǵdaıda.Qarjylyq jylǵa belgilengen AEK 52,4 mólsheri ol azamatty jerleý rásimderin atqarǵan azamatqa beriledi. Bul búgingi kúnde 132 myń 300 teńgeni quraıdy", dep aıtady "BJZQ" AQ Astana fılıalynyń dırektory Murat Sháripov.
      
Dám-tuzy taýsylyp, ómirden ozǵan kisi eger de esh jerde turaqty jumys istemese olardyń týystaryn da ókimet jarylqaýsyz qaldyrmaıdy. Mınıstrlik ókilderiniń sózi osyǵan saıady. Memlekettik qyzmetkerler, tipti, eńbegi elengen soǵys ardagerleri de dúnıeden ótken jaǵdaıda jerleýine qomaqty qarajat qarastyrylǵanyn aıtady.              

"Búgingi kúni 19 jyly onyń mólsheri 39 myń 643 teńge. QR zeınetaqymen qamsyzdandyrý zańyna sáıkes Uly Otan soǵysyna qatysýshysy nemese múgedegi qaıtys bolǵan jaǵdaıda onyń otbasyna nemese jerleýdi júzege asyratyn azamattarǵa osy búdjet týraly zańynda belgilengen AEK kórsetilgen 36,6 nemese 92 myń 415 teńge kóleminde járdemaqy taǵaıyndalady. Atalǵan járdemaqylar tek bir ret taǵaıyndalady", - deıdi QR Eńbek jáne halyqty áleýmettik qorǵaý mınıstrligi kóshi-qon basqarma basshysy Jadyra Dáýlethanova.        
    
Esesine jerleý rásiminiń shyǵyny tolyq memleket tarapynan óteletin tulǵalardyń da sanaty belgili boldy. Olardyń qataryna qoǵamnyń damýyna úles qosqan qaıratkerler kiredi. O dúnıelik bolǵan ondaı kisilerge Astanada jańadan boı kótergen Ulttyq panteonnan jer buıyrady. Al, qarapaıym halyq adamdardy tapqa bólmeı, dúnıeden ótken jaǵdaıda tolyq zeınetaqy qoryndaǵy qarjy otbasyna kómek retinde berilýi qajet degen pikirde.  

"Jerleý rásimderine berilýi qajet. Sebebi, kim biledi ómir jolymyz qandaı bolatynyn. Qarjymyzdyń bala-shaǵamyzǵa qalǵany durys. Óıtkeni, ony adal eńbegimizben tapqan tabysymyz ǵoı".
"Adam qaıtys bolǵannan keıin, onyń jınaǵan qarjysy kóp balaly otbasylarǵa, týystarymyzǵa berilýi tıis. Ol aqsha ókimetke ketpeý kerek".   

Din ókilderi bolsa, qoǵamdy baı men kedeı dep ekige jaryp, olarǵa jerlenetin arnaıy jer ázirleý, jınaǵan qarjysyna qaraı kómý durys emes degen paıymda.

"Ol qaza bolǵannan keıin, óziniń jıǵan-tergen dúnıesimen janazalanyp shyǵarylady. Ekinshi jańaǵy mırasqorlarymen óziniń aǵaıyn-týys bala-shaǵasy. Úshinshi jaýapty sol jerge adamdar. Ne bolmasa el bolyp, aǵaıyn bolyp, kórshi qolań bolyp shyǵarylady. Taǵy aıtyp ótemin, qarajatty janazaǵa ákep tireýge bolmaıdy", - deıdi "Nur Astana" meshitiniń naıb ımamy Bekzat Aójigitov.

Qoǵam belsendileri jerleý týraly zań qabyldandy, endi sonyń oryndalýyna kóńil bólýimiz qajet degen pikirde . Óıtkeni, qazir kópshilik zań jobalyry qaǵaz júzinde bar, is júzinde onyń qoldanysta ekeni bilinbeıdi, - deıdi.         

Usynǵan: Nazerke Labıhan