Almatyda «Qazaqstan» qonaqúıinde «HEALTH EXPO-2019 medısınalyq baǵyttaǵy halyqaralyq kórme ótti. Bul sharany Túrkıanyń «ExpoTurka Fuarcılık Ticaret Limited» uıymdastyrdy. Basty maqsat – eki el arasyndaǵy iskerlik qarym-qatynastardy damytý, medısına qyzmetkerleriniń Túrkıadaǵy jetekshi emhanalar men aýrýhanalarda tájirıbe jınaqtap, alǵan bilim-biligin Qazaqstanda qoldaný.
Kórmeniń ashylý saltanatynda Túrkıanyń Qazaqstandaǵy bas konsýly Ryza Qaǵan Iylmaz myrza: «HEALTH EXPO sıaqty kez kelgen kórme, sharalarda adamdar bir birimen tanysady, pikir almasady, kásibı alańda dostyq qatynas ornatady. Bizdiń qolymyzdaǵy múmkindikterden basqa elderdegi baýyrlarymyz habardar bolady. Búgingi kórmege Túrkıanyń túkpir-túkpirinen arnaıy kelgen bizdiń óte syıly ári bilikti mamandarymyz Qazaqstandaǵy áriptesterimen tájirıbe almasady, bilgen aqparattarymen bólisedi, dertine daýa izdegenderge birge emdeýdiń jolyn tabady ári Túrkıanyń medısına salasyndaǵy múmkindiktermen bólisedi degen senimdemin. Bárińizge sáttilik tileımin!», – dedi.
«ExpoTurka Fuarcılık Ticaret Limited» basshysy Halıl Chybykly Qazaqstandaǵy dárigerlerge beriletin múmkindikter týraly aıtty: «Densaýlyq týrızmi – damyǵan jáne damýshy elder úshin asa mańyzdy sala. Úzdiksiz salynyp jatqan ınvestısıalar men básekelestiktiń arqasynda atalǵan sala ýaqyt saıyn kúsheıip keledi. Túrkıada densaýlyq týrızmi Ortalyq Azıadaǵy memlekettermen salystyrǵanda, barynsha damyǵan.
Kásibı bilikti dárigerlermen qatar, tehnıkalyq mamandar joǵary deńgeıde, zamanaýı tehnologıa men medısınalyq qurylǵylar bizdegi aýrýhanalar men emhanalarda keńinen qamtylǵan. Qazaqstan men Túrkıa arasyndaǵy medısına salasynda túzilgen uzaq jyldan bergi dostyq baılanysymyzdy «HEALTH EXPO-2019» halyqaralyq kórmesi arqyly damytýdy maqsat ettik. Buıyrtsa, bul shara Almatyda jyl saıyn ótkiziledi», – dedi.
Úsh kúnge sozylatyn kórmede otandyq medısına qyzmetkerleri jalpy hırýrgıa, pedıatrıa, ortopedıa jáne travmatologıa, neırohırýrgıa, gastroenterologıa, kosmetıkalyq jáne jalpy stomatologıa, organdardy transplantasıalaý, oftalmologıa, júktilik jáne bala týý, plasıkalyq jáne estetıkalyq hırýrgıa t.b. baǵytta Túrkıanyń jetekshi emhanalary men aýrýhanalarynyń ókilderinen kásibı turǵyda tegin keńes alyp, ortaq iskerlik qarym-qatynas ornatady.
Bıyl alǵash ret ótkizilgen «HEALTH EXPO-2019» kórmesine Túrkıanyń jetekshi medısınalyq mekemeleri: Bayındır Sağlık Grubu, Diyalog İşitme Cihazları, Koç Üniversitesi Hastanesi, Medipol Üniversitesi Sağlık ve Eğitim Grubu, NeoLife Onkoloji Merkezi, Okan Üniversitesi Hastanesi, Orhun Medikal ve Özel Pendik Bölge Hastanesi ókilderi qatysty.
Uıymdastyrýshylardyń aıtýynsha, úshkúndik shara sońynda Qazaqstanda eńbek etetin 15 dáriger Túrkıadaǵy tanymal aýrýhanalar men emhanalarǵa bir aptaǵa tájirıbe almasýǵa barady. Sapardyń barlyq shyǵyny «ExpoTurka Fuarcılık Ticaret Limited» tarapynan óteledi. Bul – otandyq dárigerler men jalpy medısına salasyna qosylatyn úlken úles.
Túrkıadan tájirıbe almasyp kelgen otandyq dárigerler kóńilge túıgenderi men úırengenderin jumys barysynda qoldanady.
Názıa Joıamergenqyzy, «Túrkitildes jýrnalıser qory» QQ, www.ttjk.kz
