«Astanalyqtardyń baspana máselesin búdjet qarjysyna, komýnaldyq turǵyn úı qorynyń esebinen sheshý múmkin emes dep kesip aıtýǵa bolady». Astana qalasy ákiminiń halyqpen eseptik kezdesýi barysynda azamattardy qabyldaǵan qala basshysynyń orynbasary Nurlan Nurkenov osylaı dedi.
«Astanada komýnaldyq turǵyn úı qorynda baspana kezeginde 45 myńnan astam adam tur. Sonyń 20 myńnan astamy – túrli áleýmettik az qamtylǵan toptar», - dedi ol.
Onyń aıtýynsha, elordada turǵyn úımen qamtamasyz etý boıynsha jalǵa beriletin jáne kredıttik turǵyn úı baǵyttary bar. Máselen, jalǵa beriletin turǵyn úı boıynsha ótken 2018 jyly 180 páter paıdalanýǵa berilse, 2019 jyly 700-den astam páter óz ıesin tabady. Kredıttik turǵyn úı baǵyty boıynsha 2018 jyly 481 páter úlestirilgen bolsa, 2019 jyly 900-den astam páter paıdalanýǵa berilmek.
«Demek bıyl 1600-den astam otbasy baspanaly bolady. Eger osy qarqynmen kezek jyljysa, búgingi kúni kezekte turǵan 45 myńynshy turǵyn kemi 25 jyldan keıin baspanaly bolady. Turǵyn úı kezegindegilerdiń tizimi 45 myńmen toqtamaıtynyn taǵy qosyńyz. Osylaısha astanalyqtardyń baspana máselesin búdjet qarjysyna, komýnaldyq turǵyn úı qorynyń esebinen sheshý múmkin emes dep kesip aıtýǵa bolady», - dedi Nurkenov.
Endi ne istemek kerek?! Máseleni sheshýdiń qandaı joldary bar, - degen azamattar saýalyna:
«Ákimdik kóptiń kókeıinde júrgen baspana máselesin sheshý mehanızmderin qarastyryp jatyr. Sonyń ishinde kezekte turǵan turǵyndardyń áleýmettik osal toptaryna belgili ýaqyttan keıin satyp alý quqyǵymen páterlerdi jalǵa berý múmkindigi usynylatyn bolady. Osy arqyly otbasy tapqan aqshasyn páter ıesiniń qaltasyna emes, óz menshigine ótetin baspana úshin quıýǵa múmkindik alady», - dedi Astana ákiminiń orynbasary.
Buǵan qosa, ákimdik turǵyn úı sertıfıkattarynyń sanyn 100-den 2 myńǵa ulǵaıtqanyn taǵy bir qaıtalap ótti. Turǵyn úı sertıfıkattary atalǵan toptarǵa turǵyn úı alý úshin 1 mln teńge kóleminde alǵashqy sýbsıdıalyq jarna retinde bólinedi. Sertıfıkat nesıege baspana alý úshin aldyn ala tólem qarjysy retinde qaıtarymsyz negizde beriledi.
2018 jyly medısına qyzmetkerlerine, muǵalimder pen polıseılerge «7-20-25» baǵdarlamasy boıynsha 1 mln teńgelik 100 turǵyn úı sertıfıkaty úlestirilgen bolatyn.
Aıta keteıik, Nurlan Nurkenov osy jylǵy 15 aqpanda Astana ákiminiń orynbasary qyzmetine taǵaıyndalǵan bolatyn. Ol elordanyń densaýlyq saqtaý, ishki saıasat, jastar saıasaty men aqparat, mádenıet jáne sport salasyna qatysty máselelerge jaýap beredi.
Jomart Aıtqazynyń Facebook paraqshasynan
Pikir qaldyrý