Sońǵy kezde, shamamen, bir jyl kólemi boldy-aý, sirá, osyndaı gúl qonjyqtar kúlli álemde qaptap ketti! Ózi erekshe! Názik jandylardyń kóńil qylyn sherter taptyrmas syılyq! Al, biraq dál osy qara lentaly, kózsiz, gúldi qonjyqtardy Qytaıda o dúnıelik bolǵan balalardyń qabirine qoıatynyn estip pe edińiz? Iá, qabirge qoıady! Ári kishkentaı balanyń!

"Florıster foamıran gúlderinen jasalǵan súıkimdi qonjyqtardyń negizgi «mindeti» - erte ketken balaqaılardyń qabirin kúzetý ekenin bilmegen de shyǵar. "Sońǵy 1-2 apta ishinde dál osy qonjyqtardy jerleý rásiminde syılaıdy" degen aqparat ǵalamtordy shýlatyp jiberdi. Rasymen de solaı ma? Endeshe, solaı oılatyndardyń dálelin keltireıik.

1.Qonjyqtyń kózi, aýzy joq.

2.Moınynda qara lenta baılanǵan.

3.Aqparatty keıbir florıster rastapty.

4.Ǵalamtorǵa «jerleý rásimine arnalǵan gúldi qonjyqtar» dep jazsańyz, birden osy qonjyqtar shyǵady.

"Al, endi ol jaı ǵana básekelesterdiń qıturqy áreketi" dep, bul aqparatty joqqa shyǵarǵandardyń naqty dálelderin keltirsek.

1. Keıbir florıster bul aqparatty rastamady.

2. Qytaı salt-dástúrinde gúlden jasalǵan qonjyqtar týraly bir de bir jerde jazylmaǵan, aıtylmaǵan. Jerleý rásimine ákeletin jan-janýarlardyń bári de qytaı kúntizbesine saı. Ol tizimge qonjyq kirmeıdi. Eger áldebir qytaılyq dosynyń qabirine janýardyń músinin ákelgisi kelse, onda ol tek marqumnyń týǵan jylyna saı janýardy alyp keledi.

3.Qytaıda qaıǵyny bildiretin tús – aq tús.

4.Qara lentadaǵy «Happy everyday»  degen jazý «Árqashan baqytty» degen maǵynany bildiredi, ıaǵnı, «kúnde baqytty» degen sóz." (derekkóz: semicvetic.com)

Demek, bul eshqandaı da jerleý rásimine arnalǵan qonjyq emes. Jaı ǵana ádemi syılyq túri. Talǵamǵa talas joq. Muny da erekshe unatatyn "jankúıerler" barshylyq. 

Ǵalamtordan Qazaqstan boıynsha izdeseńiz, neshe túrin taba alasyz. Baǵasy kólemine baılanysty. 2000-2500-den bastalady.

Mysaly, shamamen:
25 sm - 9.900 teńge.
40 sm - 14.900 teńge.
60 sm - 26.900 teńge.
70 sm - 42.900 teńge.

Túsi de san alýan. Qaltańyz qalyń bolsa, qandaıyn qalasańyz da, tabylady. Naqty qaı jerden alatynyńyzǵa baılanysty. Qara bazarda, sózsiz, arzan. Al qala ishinde, arnaıy oryndardy anaǵurlym qymbattaý bolady. Tańdaý sizde.

Negizi men bul syılyqty alatyn adamdardy da túsinbeımin. Qolónermen aınalysatyndyqtan, basynda qyzyǵýshylyq tanyttym. Tipti, jasaǵym keldi. Materıaldary da qoljetimdi. Esesine, biraz tabys tabýǵa bolatyn sıaqty.

Biraq meni toqtatqan myna oı boldy. Birinshiden, munymen ne isteýge bolady? Shyn gúl emes, ıisi joq. Ne tátti emes, jep, rahattanatyn. Ne jumsaq oıynshyq emes, jastanyp jatatyn. Ekinshiden, túk paıdasy joq zatqa sonsha aqsha shyǵaryp satyp alatyn adamdarǵa obal ǵoı. Tabysy bekerge ketedi. Demek, meniń de tabysymda bereke bolmaıdy. Odan da onyń ornyna jeıtin, ne paıdalanatyn birnárse alsa... Tym quryǵanda, ýaqyt óte kele solyp qalatyn tiri gúl bolsa da. Ol da biraz ýaqyt ıisimen, túrimen aınalasyna ádemilik syılap turmaı ma? Al myna qonjyqtardy bir kórgende «PAH, shirkin!» deısiń, sosyn ary ketse birneshe ret sýretke túsesiń, áleýmettik jelige salý úshin. Boldy. Sosyn shań basyp turady. Sony oıladym da, "jasamaımyn" dep túbegeıli sheshim qabyldadym. Bastysy – nıet. Kimge, ne syılasań da, nıetiń túzý bolsa bolǵany...

Aıtpaqshy, osyndaı qonjyq alǵan názik jandylarǵa bir keńes. Ýaqyt óte kele qonjyqtyń «máni» kete bastaǵanda, gúlderin alyp, aınanyń shetine erneý qylyp jabystyryp, basqa taǵatyn áshekeı jasap, rezeńkege tigip, tipti bolmasa, aıaq kıim jáshigin túgeldeı osy qonjyqtyń gúlderimen qaptap tastasańyz, ishine asaı-múseı salýǵa arnalǵan keremet jáshik bolyp shyǵa keledi. Solaı...

Usynǵan: Maqpal Sembaı