Bıylǵy 2019 jastar jylyna oraı Aqtóbe qalasynyń jas, daryndy ánshisi Arman Jıenalıevpen Qamshy.kz aqparat agenttiginiń tilshisi suhbattasqan bolatyn.

–Kóbine halyq sizdiń ánderińizdi bilgenmen, túrińizdi tanymaı jatady? Ne sebepti?

–Negizi jurt meniń halyq ánderimdi biledi. Al ózim, ıá, tanymal emespin. Halyqqa keń taraǵan 20 shaqty avtorlyq ánim de bar. Beınebaıandarym da kóp emes. Alla qalasa, jaqyn arada Tashkentke baryp «Súıip qaldym», «Bıle, madam» sıaqty ánderge beınebaıan túsirip, respýblıkalyq arnalardan taratý josparymda bar. Endi mine, respýblıka kóleminde tanylýǵa jospar jasap jatyrmyn.

–Almaty – óner ordasy. Almatyǵa kelý josparyńyzda joq pa?

–Árıne,  ónerdiń qaınaǵan mekeni – Almaty der edim. Qazir ózimniń týyp-ósken mekenim Aqtóbedemin. On jyldyń kólemi boldy, Almatyǵa án jazdyrýǵa, ártúrli túsirilimderge, beınebaıan túsirýge kelip turamyn. Biraq barmaqtaı baq kerek. Qudaı qalasa, óner ordasyna qonys aýdarý oıda bar.

–Ánderińizdi qalaı tańdaısyz, ánine mán beresiz be, álde sózine me?

–Men ánine de, sózine de, óńdeýine, aranjırovkasyna da úlken mán beremin. Ánniń stılin tańdaý barysynda da ózimniń oıymdy únemi bildirip otyramyn. Meniń mýzykalyq bilimim bar. Sondyqtan, kompozıtorlarmen de jıi aqyldasyp, án jazý barysynda únemi birgemin desem de bolady. Garmonıa, nota, teorıa degen jaǵyn jaqsy bilemin. Ánniń hıt bolýy úlken mýzykalyq saýattylyqty qajet etedi.

–«Bıle, madam» degen ánińiz plagıat pa?

–Ia, ánshiler kóbine aýdarma ánin aıtyp tez tanylyp jatady. Men de oılana kele plagıatqa jolyqtym. Iýtýb jelisin qaraı otyra, «Bıle, madam» ánin óz qorjynyma qosyp aldym.

–Úlken ónerge qadam basýyńyzdaǵy basty maqsat ne?

–«Ónerge bir kúnde kelgen joqpyz, jáne bir kúnge kelgen joqpyz» demekshi, meniń mýzykalyq bilimim bar. Osy salada oqydym, toqydym. Óner meniń ata-anamnyń qanymen daryǵan. Ánshilikke kósheden, nemese basqa saladan júrip qosylǵan joqpyn. Úlken konkýrstarǵa qatystym. Kıeli Aqtóbe jerinen taǵy bir daryndy bala qanat qaǵyp, qazaq estradasyna tamshydaı bolsa da úlesin qossa degen armanym bar.

–Qazaq estradasynda kimmen dýet aıtqyńyz keledi?

–Meniń kýmırim – Meırambek Bespaev jáne Qurmash Mahanov. Osy kisilermen dýet aıtqym keledi. Al apaılarymyzdan Maqpal Júnisova, Qaraqat Ábildınamen qosylyp án shyrqaǵym keledi.

–Oblys aýmaǵynan ánshilerge qandaı qoldaý kórsetiledi?

–Qazir meniń turyp jatqan jerim – Aqtóbe qalasy. Oblystyq mádenıetten eshqandaı kómek kórsetilmeıdi. Olardyń aýzymyzǵa nan, qaltamyzǵa aqsha salyp jatqan eshnársesi joq. Arasynda konsertterge ǵana shaqyryp turady. Barlyq jetistik mańdaı terimizben keledi. Konsertten, toıdan tapqan tabysymyzdy artyq týflı, artyq kastúm kımesek te, klıp pen án jazdyrýǵa jumsaımyz. Ózimizdiń eńbegimizben júrgen jaıymyz bar dál qazir.

Suhbattasqan: Ásem Merekeqyzy