Qostanaıdy basqarǵan Ahmedbek Ahmetjanov "júıeli túrde para aldy" dep aıyptalyp, sotpen kináli dep tanylǵan edi. Qatań tártiptegi kolonıaǵa da qamaldy. Alaıda, kesilgen jazanyń úshten biri ótelmeı jatyp, eks-ákim bostandyqqa shyqty. Buǵan zańdyq turǵyda túsinik te berilgen. Bul týraly Qamshy.kz aqparat agenttigi Eýrazıa birinshi arnasyna silteme jasap habarlaıdy.
2015 jyl. Sol kezdegi Qostanaı ákimi Ahmedbek Ahmedjanovtyń birden eki orynbasary paramen ustalyp, qoldaryna kisen salyndy. Tóbeme jaı túskendeı boldym» degen shahar basshysy da kóp uzamaı tergeý ızolátorynan tabyldy. Keıin prokýratýra ákim qyzmetke kirisken 2014 jyldan bastap para alýmen shuǵyldandy dep aıyp taǵady. Somasy ondaǵan mıllıon teńge.
Al byltyr is joǵary sotqa jetti. Ondaǵylar ákim paranyń bir bóligin naqty alǵanyna kúmán keltirdi. Onyń ústine amnıstıa bola qalyp, jaza qysqardy. Eks-ákim 67,5 mln teńge kóleminde shyǵyndy óteıdi. Sońynda jaza 4 jyl 10 aıǵa deıin qysqarǵan. Shartty túrde bostandyqqa shyǵarý týraly ótinish te qoldaý taýyp, birinshi sáýir kúni túrmeden shyǵady.
Aýyl sharýashylyǵy mınıstriniń orynbasary laýazymynda bolǵan Múslim Ómiráev ta, bastapqyda qatań tártiptegi kolonıaǵa qamalǵan edi. Aıyp malǵa arnalǵan vaksınany alýǵa bólingen qarjynyń talan-tarajǵa salynýy deregi boıynsha taǵylǵan. 7 mln teńge men 100 myń dollarlyq para bolǵany aıtyldy. Alaıda eki jyldan soń Joǵary sot Múslim Ómiráevqa taǵylǵan aıypty ózge bapqa aýystyryp, jazany 4 jylǵa deıin qysqartty. 2016 jyldyń jeltoqsanynda bostandyqtan aıyrý jazasy, bostandyqty shekteýge almasty. Eks-vıse-mınıstr ózine taǵylǵan aıypty moıyndamaı, para emes, qaryzǵa aqsha alǵanmyn degen edi.
2014-te eldi eleń etkizgen oqıǵa. Tarıhta tuńǵysh ret premer-mınıstrge aıyp taǵyldy. Úıqamaqqa alyndy. Kásipkerlikpen zańsyz shuǵyldaný, qyzmettik babyn asyra paıdalaný, senip tapsyrylǵan múlikti talan-tarajǵa salý derekteri boıynsha eks-premer kináli dep tanylyp, 10 jylǵa bas bostandyǵynan aıyryldy. Keıin jaza eki, sosyn bir jarym jylǵa qysqartyldy. Serik Ahmetov 2 mlrd teńge shyǵyndy ótep, jazasyn jeńildetýge múmkindik aldy.
«...Rahmet sizge! Densaýlyǵyńyz qalaı, aǵa? Densaýlyǵym jaqsy, rahmet!» - dedi Serik Ahmetov.
Jazasy ýaqyt óte jeńildegen sheneýnikterdiń qatary munymen shektelmeıdi. Depýtattar jemqorlyq áreketke qatań jaza jaýap bolýy tıis deıdi. Biraq gýmanızasıaǵa da qarsy shyǵý qıyn. Sondyqtan kelgen shyǵyn ótelýin talap etý kerek degen paıymda.
«Menińshe, bul jerde jemqorlyq degen, memleketke qarsy, ádilettikke, ekonomıkaǵa qarsy qylmys. Biz árıne bul jerde eń alǵashqy talap qoıýymyz kerek. Urlaǵan aqshany qaıtarý. Sodan keıin ǵana olardy aqtaýǵa, sodan keıin ǵana bostandyqqa shyǵarýǵa bolady dep senemin», deıdi QR Parlamenti májilisiniń depýtaty Azat Perýashev.
Sot sheshimimen abaqtyǵa qamalmaı-aq, qylmystyq jaýaptan qutylǵandar da bar. «Qorǵas» halyqaralyq ortalyǵyn basqarǵan Vasılıı Nı bir mln dollar para alyp jatqan jerinde qolǵa túsken edi. Alaıda, minezdemesinde min bolmaı, kináni tolyq moıyndap, ókingeni úshin sot osyndaı sheshim qabyldady dep túsindirildi. Bul túsindirmege birdeńe alyp-qosý qıyn endi.
Usynǵan: Nazerke Labıhan
