"Samuryq-Qazyna" ulttyq ál-aýqat qory" AQ tóraǵasy Ahmetjan Esimov búgin bir túıtkildiń shetin shyǵardy.

Onyń aıtýynsha, "Samuryq-Qazyna" aktıvteriniń jıi buǵattalýy ınvestısıalyq jaǵdaıdyń tepe-teńdigin buzýy ábden múmkin.

2017 jyly jalpy quny 5 mıllıard dollar turatyn Qashaǵan aksıalaryna shekteý qoıylsa, byltyr Túrkıadaǵy "Shekerbanktiń" de 38 mıllıon dollarlyq aksıasy buǵattalǵan.

"Ókinishke qaraı, aktıvterdiń buǵattalýyna baılanysty qordy sheteldik ıýrısdıksıalardaǵy sot prosesterine udaıy tartý praktıkasy beleń alyp barady", - dedi Esimov úkimet otyrysynda.

Óziniń kóp aıtyla bermeıtin áńgimesinen keıin qaıta sóz alǵan ol:

"Qor aktıvteriniń buǵattalýy bizdiń aktıvterimizdiń ınvestısıalyq tartymdylyǵyna aıtarlyqtaı jaǵymsyz áser etýde. Men muny tek Roman Vasılevıchke (Indýstrıa jáne ınfraqurylymdyq damý mınıstri Sklár – red.) aıtyp otyrǵanym joq. Bizdiń el úshin munyń qanshalyqty mańyzdy ekenin basqa da jigitter jaqsylap túsinsin degenim ǵoı", - dedi.

Osyǵan baılanysty "Samuryq-Qazyna" qory Ádilet jáne Qarjy mınıstrlikterine respýblıkaǵa qarsy shyǵarylǵan halyqaralyq arbıtrajdyq prosester boıynsha sheshimderdi oryndaý tetigin ázirleýdi usynǵan.

"Ondaı mehanızm bolsa, Ulttyq qordyń, kvazımemlekettik sektordyń aktıvteriniń buǵattalýynan qorǵanýǵa bolady", - deıdi ol.