Azat Perýashev Úkimetke tarıhı ataýdyń qaıtarylýyna dálelder keltirip, Qazaq Respýblıkasynyń 100-jyldyǵyn ótkizýdi qaıta usyndy, dep habarlady "Aq Jol" partıasynyń baspasóz qyzmeti Qamshy.kz aqparat agenttigine.

Azat Perýashev Úkimetke tarıhı ataýdyń qaıtarylýyna dálelder keltirip, Qazaq Respýblıkasynyń 100-jyldyǵyn ótkizýdi qaıta usyndy – tıisti hat Qazaqstan Respýblıkasy Premer-Mınıstriniń orynbasary Gúlshara Naýshaqyzy Ábdiqalyqovaǵa joldandy.(hattyń mátini tómende berilgen).

Qazaqstan Respýblıkasy

Premer-Mınıstriniń orynbasary

G.N. Ábdiqalyqovaǵa

Qurmetti Gúlshara Naýshaqyzy

Qazirgi Táýelsiz Qazaqstannyń tarıhı tamyry tereńde jatqany barshamyzǵa málim.

Búkil adamzattyń damýyna áser etken arǵy atalarymyzdyń jańashyldyǵyn jýyrda ǵana Prezıdent Nursultan Nazarbaev «Uly dalanyń jeti qyry» maqalasynda ashyp kórsetti.

«Máńgilik El» ıdeıasynyń arqasynda Qazaq handyǵynyń 550 jyldyǵy joǵary deńgeıde atalyp ótti.

Elbasy Nursultan Nazarbaev «Alash» qozǵalysynyń 100 jyldyǵyn merekeleý barysynda olardyń umtylysyn ata-babalarymyzdyń azattyq alyp, derbes memleket qurý jolyndaǵy san ǵasyrlyq amanatyna teńedi.

Alash Ordanyń dál osy burynǵy jetekshileri Keńes ókimetimen kelissóz júrgizip, bolashaq respýblıkanyń terıtorıalyq tutastyǵy úshin kúresti. 1920 jyly tamyz aıynda Máskeýde SovNarKom-nyń otyrysynda shekara máselesin jan alysyp talqylaǵanda, Álimhan Ermekov birneshe ret baıandama jasady. Osy jumysqa Ahmet Baıtursyn, Álıhan Bókeıhan jáne basqa da qazaq delegasıasynyń 12 múshesi belsene qatysty. Olar Álıhan Bókeıhan júrgizgen ǵylymı ekspedısıalarda jınastyrǵan derekterge súıenip, qazaq jeriniń halqymyzǵa tıesili ekenin dáleldep shyqty.

Zor eńbektiń nátıjesinde, sol jyly Qyrǵyz Avtonomıalyq Keńestik Respýblıkasy qurylyp, al 1925-shi jyldan bastap oǵan halqymyzdyń baıyrǵy atalymyna sáıkes Qazaq AKSR-i degen ataý berildi.

Qurmetti Gúlshara Naýshaqyzy!

Kelesi, 2020 jyly memlekettilik turǵysynan bolashaq Táýelsiz Qazaqstannyń irgetasyna aınalǵan KSRO quramyndaǵy Qazaq Respýblıkasynyń (AKSR, keıin KSR) qurylǵanyna 100 jyl tolady.

Osyǵan uqsas negizde, byltyr Ázirbaıjan Respýblıkasy óziniń 100 jyldyǵyn atap ótse, al bıyl Reseı prezıdenti V.Pýtınniń resmı jarlyǵymen «Alashordanyń» qurdasy – Bashqurt Respýblıkasy 100-jyldyǵyn toılaıdy.

Osy oraıda, «Aq jol» Demokratıalyq partıasy:

1) Qazaq Respýblıkasynyń 100 jyldyǵyna memlekettik dárejede kóńil bólinip, bul datany laıyqty deńgeıde atap ótýdi usynady: ǵylymı konferensıalar uıymdastyrý, oǵan sebepker bolǵan qaıratkerlerdiń eńbekterin jarıalaý, olardyń esimderin kósheler men mekemelerge berip, poshta markilerin, estelik monetalar shyǵarý jáne t.b.

2) Respýblıkanyń 100 jyldyǵy sheńberinde ótkiziletin is-sharalar men qoldanylatyn buıymdarǵa «Qazaq Respýblıkasy» ataýyn resmı túrde paıdalaný múmkindigin qarastyrýdy usynamyz.

Mundaı usynys bildirýimizge negiz bolyp otyrǵan:

a) «Qazaqstan Respýblıkasy» degen sóz tirkesin bul mereıtoıda qoldaný múmkin emes. Tarıhı turǵydan alyp qaraıtyn bolsaq, ol «Qazaq AKSR», «Qazaq KSR» ataýlarynyń túpnusqasyna para-par emes jáne de resmı ataý retinde 1991 jyly Táýelsizdik alǵannan keıin ǵana paıda bolǵan.

b) Respýblıkanyń 100 jyldyǵy aıasynda qoldanylatyn ataýdyń negizin tarıhı turǵyda túpnusqaǵa para-par etip alý qajet (Qazaq AKSR, Qazaq KSR). Iaǵnı, odan ótpeli («Qyrǵyz», «avtonomıaly») jáne ıdeologıalyq («keńestik sosıalısik») termınderin alyp tastap, alaıda memlekettik qurylymnyń quqyqtyq formasy (respýblıkany) qaldyrý kerek. Osy sebepti, is-sharalar kezinde «Qazaq Respýblıkasynyń 100 jyldyǵy» ataýyn paıdalaný qajet dep sanaımyz.

Tipti totalıtarlyq bıliktiń ózi moıyndaǵan «Qazaq Respýblıkasy» baıyrǵy termınin resmı túrde qoldaný – tek tarıhı shyndyqqa súıený ǵana emes, barsha kópultty otandastarymyzdyń birligi men yntymaǵyn odan ári nyǵaıtýǵa serpin beretinine senimdimin.

Qurmetpen,

Fraksıa basshysy,

Depýtat                                                                                                    A.Perýashev