Ýkraınanyń jańa prezıdenti Vladımır Zelenskııdiń Reseı kóshbasshysy Vladımır Pýtınmen múmkin kelissózderin AQSH bıligi qos qolyn kótere qoldaıdy.

Bul týraly AQSH-tyń Ýkraına isi jónindegi memlekettik departamentiniń ókili Kýrt Volker amerıkalyq telearnalardyń birindegi tikeleı efırde málimdedi.

Volker Zelenskııdiń saıası pozısıasyn qoldaıtynyn, onyń Ýkraınanyń trrıtorıalyq tutastyǵyn saqtaý, Qyrymdy, Donbasstyń birqatar jerlerin qaıtarý týrasyndaǵy qulshynystarynyń durys ekendigin jetkizdi.

"Onyń málimdemelerinde aıtylǵan, kóterilgen máseleler óte oryndy jáne óte durys. Ol Ýkraınanyń terıtorıalyq tutastyǵyn qaıtarýdy qalaıdy. Ol jerdi óz qaramaǵyna qaıta oraltpaq. Zelenskıı alǵan betinen qaıtýdy oılamaıtyn da sekildi. Reseı men Ýkraına tikeleı kelissózder jasaýy tıis. Zelenskııdiń Pýtınmen tikeleı sóılesýi – jaman sheshim emes", - dedi ol.

Amerıkalyq ókil oryn alýy múmkin tamasha perspektıvalar týraly aıtty. Sonymen qatar, Volkerdiń oıynsha, Reseıdiń kelissózderdegi tartyp alynǵan ýkraınalyq terıtorıalar turǵysyndaǵy pozısıasynyń mańyzdy ekenin atady.

"Ol jańa prezıdent bolǵannan keıin ózgeshe saıasat ustanýy tıis. Eń birinshi qadam retinde Reseıdiń okýpasıalanǵan aımaqtar jónindegi kózqarasyn, pozısıasyn ózgertýge talpynys jasaý bolýy kerek", - dedi amerıkalyq ókil.

Eske sala keteıik, birshama ýaqyt buryn Pýtınniń keńesshileriniń biri Ýkraınadaǵy saılaýǵa qatysty Reseı prezıdentiniń pozısıasy týraly aıtqan bolatyn.

Pýtın Medvedchýktyń aýzymen aıtylǵan málimdemesinde Ýkraına halqy kimdi memleket basshysy retinde tańdasa da, sol adammen jumys jasaýǵa talpynatynyn aıtqan-dy.