Ómirdiń názik ıirimderin jan júregimen sezine bilgen Nadıra Aýhadıevanyń oımaqtaı oılaryn nazarlaryńyzǵa usynamyz. Ózgelerge aıtar ózindik parasaty bar arýdyń suhbaty Qamshy.kz aqparat agenttiginde jaryq kórgen bolatyn. Búgingi tańda áleýmettik jelide belsendi arýdyń jazbalary da eshkimdi beı-jaı qaldyrǵan emes.
Árbir sátińiz baqytqa toly
Sizdi shynaıy qýanyshqa bóleıtin is – eń aldymen ózińizdiń kózqarasyńyz ben ustanymyńyzǵa baılanysty. Keıbir adamdar men mynadaı jaǵdaı bolǵanda ózimdi qýanyshty sezinemin, belgili bir jetistikke jetken kezde men baqytty bolamyn deıdi. Sony siz nege qazir sezine almaısyz? Ne sebepti ýaqyt ótip jatsa da jetistikke jetken joqsyz? Sebebi men mynadaı jaǵdaı bolǵanda ǵana qýanyshty bolamyn dep emes, dál qazirgi jaǵdaıda qýanyshty bolýdy úırenińiz! Adam qolda bardyń qadirin túsinbeıdi. Odan aıyrylǵan sátte ǵana kóz jetkize bastaıdy. Betin ári qylsyn, biraq úıińde bireý aýyryp qalsa ǵana ony baǵalaısyń, jaǵdaıyn túsine bastaısyń.
Sıqyrly taıaqshasyn sermese ómirimiz gúl bolady dep oılaımyz
Kemshiliksiz pende joq. Meniń de úlgi alýǵa bolmaıtyn kemshilikterim jetkilikti. Alaıda men áli de sol minezimdi túzetip, áli de jumys isteýmen kelemin. Adam qatelikter jasaý arqyly ǵana shyńdalady. Sol arqyly ósesiń, úırenesiń bir jetistikke jetesiń. Bir tujyrym jasap, bir qorytyndyǵa kelesiń. Meniń qateligim – halyqtyq emderge senip júrip, biraz ýaqytymdy joǵaltyp alǵanymda. Dárigerlerge senbeı júrdim. Qazir bir jerde emshi bar eken, ómirimdi 100% boljap berdi dese, sol adammen sóıleskim kelmeıdi. Ondaı qatelikti endi jasamaımyn deımin. Mysaly, sizdiń basyńyzda sheshimin tappaǵan bir másele bar. Ne istesem eken dep, kúndiz-túni bas qatyrasyz. Alaıda sol máseleńizdi sheship beretin arnaıy mamannyń da bar ekenin bilesiz ǵoı?! Ol kisi oqyǵan, qanshama jyl sol mamandyq boıynsha jumys istep jatyr. Siz sol mamanǵa barasyz, máseleńizdi aıtasyz, sheshimin tabasyz. Eń qysqa joly sol. Men sıaqty san túrli jolyn izdemeý kerek. Ómirde barlyǵy qarapaıym. Ár túrli ǵylymı negizde dáleldengen kitaptar bar. Sondaı kitaptardy oqý kerek. Eń aldymen ne nárseniń bolsa da, sebebin izdegen durys. Biz keıde jalqaýlyǵymyz ustap, odan da baqsyǵa baryp, 1000 teńgesin bere salaıyq deımiz. Onyń sıqyrly taıaqshasy bar, sony sermese, ómirimiz gúl bolady dep oılaımyz. Men de dárigerlerge senbedim, qoryqtym. Qorqynysh sezimi meni durys emes joldarǵa ıtermeledi. Ol sezimdi múldem alyp tastaý kerek. Basynda protezben júrgen kezde "qulap qalam ba?" dep qorqatynmyn. Ol da kedergi bolýy múmkin.
Teatrǵa barǵandy unatamyn. Abaı atyndaǵy opera jáne balet teatryna, Muhtar Áýezov teatryna jıi baramyn. Mysaly, opera jáne balet teatrynda jandy daýysta orkestr oınaıdy. Ol jerde klasıka oryndalady. Taza, tiri mýzyka tyńdap qaıtasyń. Sondaı jerde otyryp jandy daýystaǵy mýzyka áýenine qulaq túrseń, kádimgideı demalyp shyǵasyń. Áýendi estip, árbir notasyn boıyńa darytasyń. Shynaıy mýzyka kóńil-kúıińe áser etedi. Teatr – shynaıylyqtyń aınasy. Adam júregin rýhanı baılyqqa toltyrǵysy kelse mindetti túrde teatrǵa barsyn.
Múgedekterdiń jumysqa turýy qıyn
Bizde kezekke turyp úı alý óte qıyn. Mysaly, meni jáne inimdi anam qazir turyp jatqan páterimizge úlesker retinde jazyp qoıǵan eken. Múgedektik boıynsha kezekke turýǵa bolady, úı beriledi eken degendi bireýden estidim. Men de kezekke qujattarymdy tapsyryp qoıaıyn dep oıladym. Ol 1-2 jyldyń kóleminde kele qalmaıdy ǵoı. Ony 10 jyldap kútesiń. Bir emes úsh ret qujat tapsyrdym. Úsheýinde de "maǵan úı berilmeıdi" dedi. Sóıtip meni úleskerlikten shyǵaryp, úıdi anamnyń atyna ǵana aýdaratyn bolsaq, taǵy bes jyl kútedi ekenbiz. Óıtkeni bes jyl kóleminde seniń atyńda eshqandaı dúnıe-múlik bolmaý kerek. Turǵyn úı qurylys jınaq bankine bardym. Ol jerde aqsha salyp, úsh jyl kóleminde jınaıdy ekensiń. Áńgime onymen de bitpeıdi. Baǵdarlamamen úı alý úshin seniń jalaqyń ortasha eseptegende 200 myń teńge bolý kerek. Odan tómen bolsa bermeıdi. Sodan keıin men kóp oılandym. Ondaı jalaqyǵa kim meni jumysqa alady? Mysaly meniń jaǵdaıymda saǵat tańǵy toǵyzdan keshki altyǵa deıin isteı almaımyn.
Ózińe senimdi bol
Ózińe senim arta bil. Birde men ózimniń renishimmen jumys istegim keldi. Naqtyraq aıtar bolsam, keıbir adamdardy keshirip, renishimdi basýdy oıladym. Sóıtip osy jóninde bir maqala oqydym (qaı jerden oqyǵanym esimde joq). Ol jerde óziń renjigen adamdardyń tizimin jazyp, ne úshin renjigenińdi qaǵazǵa túsir dep aıtylǵan. Sosyn ol adamdy oısha elestetip, seni keshirdim dep ishińnen qaıtalaýyń kerek eken. Meniń oıymsha, renishti umytýdyń eń tıimdi tásili – renjitken adamyńnan myqty bola túsý kerek. Ózińdi óziń jetildir, oqy, izden, eńbekten. Eńbektenseń boıyńda senimdilik paıda bolady.. Ózine senimdi adam ózgelerge ókpe artpaıdy. Ózine senimdi adamdy eshkim de renjite almaıdy.
Eń aldymen ár nárseniń sebebin izdeńiz. Nege? Nege siz ózińizge senbeısiz? Múmkin bala kezińizde sizdiń kemshilikterińizdi betińizge basqan bolar. Seniń qolyńnan kelmeıdi, qoıa sal degender bolǵan shyǵar. Sol úshin eń aldymen kezdesken qıynshylyqtyń sebebin izdeý kerek. Jáne sol sebebin múldem alyp tastaýǵa tyrysý kerek. Bul densaýlyqqa da baılanysty. Bir jerimiz aýyrsa dári jazyp beredi, dári - aýrýdyń belgilerin alyp tastaıdy. Mysaly, basyńyz aýyryp tur delik, sizge dári jazyp beredi. Bas aýrýynyń belgileri ketedi. Al ne sebepti bas aýrýy paıda boldy degenge mán bermeımiz. Sebebin izdemeımiz. Negizi eń aldymen sebebin anyqtaýymyz kerek. Másele de sol sıaqty. Eń aldymen sebebimen kúresińiz.
Meniń aıaqqa turyp, ómirge ózgeshe kózqaraspen qaraýyma eshqandaı motıvasıalyq kitaptar, trenıńter áser etken joq. Men tabıǵatymnan minezim qatty adammyn. Árdaıym alǵa qoıǵan maqsatyma jetýge tyrysamyn. Ózgelerdiń maǵan aıaýshylyq sezimmen qaraǵanyn qalamaǵannan bolar, tósekke tańylyp jatqym kelmedi. Kóbirek serýendep, el aldynda júrgendi unatamyn. Sizde erteńgi kúndi nemese ózgeshe sátti kútip, bir baqyttyń bolaryn tosyp jatpańyz. Baqytty bolýǵa búgingi kúnnen, dál qazirgi sátten bastap aqyryn qadam jasańyz. Men de bolashaqtan zor úmit kútemin. Erteńgi kúnimniń jarqyn bolaryna senemin.
Daıyndaǵan: Marjan Sábet
Oqı otyryńyz:
