Kópbalaly otbasynyń baspanasyn tegin jóndep beretin "Anashym, biz úıdemiz" atty jańa telejoba óz isin bastamaqshy. Oǵan qalaı qatysýǵa bolatyny jóninde Aqparat jáne qoǵamdyq damý mınıstri Dáýren Abaev aıtyp berdi dep habarlaıdy Qamshy.kz aqparat agenttigi sputniknews.kz saıtyna silteme jasap. 

Mınıstr atap ótkendeı, turmysy nashar otbasylarǵa qoldaý kórsetý - memlekettiń basty mindetteriniń biri.

"Aqparat jáne qoǵamdyq damý mınıstrligi kópbalaly otbasylarǵa baılanysty bastamalardy qoldaýǵa árdaıym daıyn. Osy oraıda memlekettik tapsyrys aıasynda "31 arnamen" birigip "Anashym, biz úıdemiz" atty jańa jobany kórermenge usynyp otyrmyz. Memleketten bul jobaǵa 130 mıllıon teńge bólindi. Bul qarjy jyldyń sońyna deıin eseptelgen. Qalǵan qarajatty arna basshylyǵy ózi qosady", - dedi Dáýren Abaev ortalyq komýnıkasıalar qyzmetinde ótken brıfıńte.

Sonymen qatar, vedomstvo mınıstri telejoba aıasynda 20-dan astam otbasynyń úıi jóndeletinin aıtyp, baǵdarlamanyń sharttaryn túsindirdi.

"Baǵdarlamaǵa qatysý úshin otbasynda 4 jáne odan kóp bala bolýy kerek. Olar "31" telearnaǵa ótinish beredi. Arnadaǵy komısıa músheleri aqyldasa kele, tıisti sheshimdi qabyldaıdy. Biz telearnaǵa tolyǵymen senemiz. Joba aıasynda 20-dan astam otbasynyń úıi jóndeledi. Sondaı-aq telejoba Nur-Sultan, Almatyda ǵana emes, barlyq óńirdi qamtıdy. Eger otbasynyń tarıhy, jazǵan haty telearnanyń redaksıasyna unasa, túsirý toby aýyldarǵa da barady", - dedi mınıstr.

Osy oraıda onyń sózin "31 arnanyń" bas dırektory Iýrıı Brodskıı tolyqtyrdy.

"Búgin áleýmettik mańyzy bar "Anashym, biz úıdemiz" jobasynyń tusaýyn keskeli otyrmyz. Onyń maqsaty - kópbalaly jáne turmysy nashar otbasylardyń úıin jóndep berý jáne turmysyn jaqsartý. Baǵdarlamanyń birinshi maýsymy 24 bólimnen turady. Baǵdarlama Qazaqstannyń barlyq óńirinde túsiriledi. Iaǵnı jobaǵa 24 otbasy qatysa alady. Baǵdarlama odan ári jalǵasady degen úmittemiz", - dedi bas dırektor.

Arna basshysy baǵdarlamany túsirý ońaı emestigin de atap ótti.

"Sebebi logıstıkany, ekspedısıany, quraldardy jetkizýdi esepke alyńyz. Biz úshin eń mańyzdysy – memlekettiń kómegimen otbasylardy baqytty etý. Iaǵnı olardyń baspanasyn jóndep berip, jańa ómir syılaý. Ekinshiden, biz kórermenge pozıtıvti kóńil-kúı syılaǵymyz keledi. Jobamyzdyń sátti shyqqanyn qalaımyz", - dep túıindedi sózin ol.

Aıta ketsek, "Anashym, biz úıdemiz" baǵdarlamasy bıyl 11 tamyzdan bastap "31 arnadan" kórsetiledi.

Oqı otyryńyz, ♦Elimizde "Anashym, biz úıdemiz" atty áleýmettik telejoba bastalady (vıdeo)

Usynǵan: Maqpal Sembaı