Jańa KTK-niń qoldanysqa berilýi oblys ortalyǵynyń sol jaǵalaýyndaǵy káriz qoryn tazalaý máselesin sheshedi, ol aǵymdaǵy jyldyń sońyna josparlanǵan, dep habarlaıdy Atyraý oblysynyń Óńirlik komýnıkasıalar qyzmeti.

Qurylystyń maqsaty – ekologıalyq jaǵdaıdy jaqsartý, sol jaǵalaý drenajdarynyń úzilissiz ketýin qamtamasyz etý.

Merdiger málimdegendeı, qazirgi ýaqytta býlaný alańdaryn, tazartylmaǵan aǵyndy sýlardy, tunba alańdaryn, bıoreaktordy, qosymsha tundyrý sısternalary men tehnologıalyq prosestiń basqa da obektilerin salý boıynsha jumystar júrgizilýde. Negizgi aǵyn sorǵy stansıasy tehnologıalyq jabdyqtardy ornatýǵa daıyn.

-Qaladaǵy turmystyq aǵyn-sý birneshe kezeńmen tazartylady. KTK-ne kiretin aǵyndar tehnıkalyq deńgeıde óńdeledi jáne tehnıkalyq qajettilikter úshin paıdalanylýy múmkin. Mysaly, tazartylǵan sý ónim bermeıtin daqyldardy sýarýǵa jaramdy, al sýarmaly jerlerde zararsyzdandyrylǵan organomıneraldy preparatty tyńaıtqysh retinde qoldanýǵa bolady,- dep habarlady «Pavlodar ózen porty» AQ joba menedjeri Asylbek Anarbaev.

Qalanyń sol jaǵalaýy úshin aǵyndy sýlardy tazartý qondyrǵysy qalanyń shyǵys jáne ońtústik-shyǵys bóliginde ornalasqan. Keshenniń quramyna kárizdik kanalızasıa alańy, aǵyndy sýlardy tazartý qondyrǵylary, bıologıalyq toǵandar men býlaný alańdary, sondaı-aq ,tazartylǵan jáne óńdelmegen aǵyn sýlardy tazartý, qoldanystaǵy sorǵy stansıalaryn qosý kiredi.

- Nysan qýattylyǵy táýligine 70 000 kýb metr aǵyndy quraıdy. Atalǵan joba 100 000 kýb metrge deıin keńeıtýge josparlanǵan. Nysandy synaq merzimde iske qosý 6 aı kólemine eseptelip, aǵymdaǵy jyldyń qarasha aıyna josparlanǵan, - deıdi Atyraý oblystyq qurylys basqarmasynyń basshysy Málik Amanov.

Aıta keteıik, jobanyń bas merdigeri «Pavlodar ózen porty» AQ. Buryn, aımaq basshysy Nurlan Noǵaev «Atyraý Sý Arnasy» basshysyna qurylys jumystaryna belsene qatysý jóninde tapsyrma bergen bolatyn. Keıin bul nysan atalǵan komýnaldyq mekeme qaramaǵyna beriletin bolady.

Aıta ketý kerek, jańa KTK iske qosylǵannan keıin, jyldar boıy qala turǵyndarynyń narazylyǵyn týdyrǵan qoldanystaǵy «Týhlaıa balka» jabylady. Aǵyndy sýlar aǵyny býlaný alańdaryna engenge deıin jańa KTK-niń kómegimen jer asty sýlaryn, topyraqty jáne atmosferalyq aýany tazartýdyń tolyq sıklinen ótedi.